Монгол Улсын Ерөнхийлөгч У.Хүрэлсүх, Хүнс, хөдөө аж ахуй, хөнгөн үйлдвэрийн сайд Х.Болорчулуун нар газар тариалангийн гол бүс нутаг - Төв, Сэлэнгэ, Дархан-Уул аймагт ажиллан ургац хураалтын явцтай танилцаж, хүнсний ногоо, газар тариалангийн үйлдвэрлэл эрхлэгчидтэй уулзлаа. 

Ерөнхийлөгч У.Хүрэлсүхийн дэвшүүлсэн “Хангамж хангамж, аюулгүй байдал” үндэсний хөдөлгөөнийг дэмжин, ирэх 5 жилд 19 нэр төрлийн хүнсний бүтээгдэхүүнийг дотоодоосоо бүрэн хангах зорилтыг хэрэгжүүлэхээр салбар яамнаас мэргэжлийн холбоод, тариаланчид, ногоочид, үйлдвэрлэгчидтэй хамтран ажиллаж байна. 

“Хүнсний хувьсгал” хийх нэн хариуцлагатай үүргийг гардан гүйцэтгэх хүмүүс бол тариаланчид, хүнсний ногооны үйлдвэрлэл эрхлэгчид, үйлдвэрлэгчид юм гэдгийг сайд онцлоод, яамны зүгээс бодлогоор дэмжин, нягт хамтран ажиллахаа илэрхийллээ. 

Энэ жил ургацын урьдчилсан балансаар 470.3 мянган тонн үр тариа, үүнээс 441.4 мянган тонн улаанбуудай, 234.1 мянган тонн төмс, 125.8 мянган тонн хүнсний ногоо, 55.7 мянган тонн  тосны ургамал, 104.4 мянган тонн малын тэжээлийн ургамал хураан авах төлөвтэй байна. 

Өнөөдрийн мэдээгээр 99.3 мянган тонн улаанбуудай, 150.1 мянган тонн төмс, 58.3 мянган тонн хүнсний ногоо, 26.3 мянган тонн тэжээлийн ургамал, 6.6 мянган тонн тосны ургамал хураан авчээ. Хувиар тооцвол, улаанбуудай 25.1 хувь, төмс 68.9 хувь, хүнсний ногоо 53.8 хувь, тэжээл 15.4 хувь, тосны ургамал 10.9 хувьтай ургац хураалтын ажил үргэлжилж байна.