Тагнуулын ерөнхий газраас сэрэмжлүүлж байна. 

Цар тахлын хөл хорио тавигдсанаас хойш зүүн өмнөд Азийн орнуудад 20-35 насны залуучууд хүн худалдаалах гэмт хэрэгт өртөж, амь нас эрүүл мэндээрээ хохирол явдал нэмэгдсэн.
Тухайлбал, дотоод мөргөлдөөний улмаас газар нутгийн зарим хэсэг нь зэвсэгт босогчдын мэдэлд ороод байгаа Мяньмар улсын “КК Парк” гэх газарт Монгол Улсын иргэд хохирогч болсон нь тогтоогдлоо.

"КК Парк"-д цахим луйвар, биеэ үнэлэлт, хөдөлмөрийн мөлжлөг болон мансууруулах бодисын хууль бус худалдаа зохион байгуулдаг талаар хил залгаа орнуудын хууль сахиулах байгууллагаас анхааруулж өөрийн иргэдээ гэмт хэрэгт холбогдохоос урьдчилан сэргийлж эхэлсэн.

Дээрх хэргийг үйлдэхдээ, интернет сүлжээнд англи, хятад хэлний орчуулагч, хүний нөөцийн мэргэжилтэн, оператор зэрэг ажилд өндөр, цалин хангамж амласан худал зар мэдээлэл оруулж, иргэдийг хууран мэхэлж авч иржээ. Улмаар онгоцны зардал, хувцас, хоолны зардлыг хариуцсан нэрээр өрийн дарамтад оруулан хүч хэрэглэх, айлган сүрдүүлэх замаар цэрэгжсэн хамгаалалтын дор албадан хөдөлмөр эрхлүүлдэг.

Хохирогчид бусдын хүчинд автан шинээр хүн олж ирэх, зуучлах ажлыг гүйцэтгэж байгаа нь одоо байгаа нөхцөл байдлыг хүндрүүлж байна.

Гадаадын хууль сахиулах байгууллагаас хохирогч болсон  иргэдээ эх оронд нь буцаах ажиллагааг тасралтгүй хэрэгжүүлж байгаа боловч тухайн бүс нь зэвсэгт босогчдын мэдэлд байгаа тул энэ ажил удаашралтай байна. Манай улсын Тагнуулын ерөнхий газраас бусад төрийн холбогдох байгууллагуудтай хамтран иргэдээ буцаах, эх оронд нь авч ирэх ажлыг хэрэгжүүлж байна. Иймд хөдөлмөрийн таатай нөхцөл амлаж, өндөр цалинтай ажилд зуучилна гэх худал мэдээлэлд хөтлөгдөн гадаад улсад зорчихоос сэрэмжлүүлье.