УИХ дахь АН-ын бүлгийн хоёр гишүүн Үндсэн хуулийн Цэцэд өргөдөл гаргасны үр дүнгээр бүтэц, бүрэлдэхүүндээ өөрчлөлт оруулсан Л.Оюун-Эрдэнийн Засгийн газарт одоо хоёр сайдын суудал сул байгаа. Засгийн газрын гишүүн бөгөөд Боомтын сэргэлтийн үндэсний хорооны даргыг анхнаасаа томилоогүй байсан бол Хөдөлмөр, нийгмийн хамгааллын сайд өнгөрсөн долоо хоногт огцорсноос ийн хоёр сайдын орон гарсан.

Үүн дээр Засгийн газрын дан дээлтэй сайд нарын хоёрыг нь буюу Эрүүл мэндийн болон Барилга, хот байгуулалтын сайдыг солино хэмээж буй. Дан дээлтэй сайд нарыг солихгүй үлдээснийг Үндсэн хуулийн цэцэд гаргасан өргөдлийнх нь хариу болгон АН-ыг Засгийн газарт урих гэж байна хэмээж байв. Энэ нь ч үнэний ортой. Засгийн газрарт АН-ыг урих тухай аман ярианууд МАН-ын удирдлагын төвшинд яригдсан бөгөөд АН-ынханд ч энэ тухайгаа дуулгаад байсан нь үнэн байв.

Гэхдээ Засгийн газарт АН-ыг оруулах ярианд өчигдөр Засгийн газрын Хэрэг эрхлэх газрын дарга, МАН-ын ерөнхий нарийн бичгийн дарга Д.Амарбаясгалан цэг тавилаа. Тэрбээр, “УИХ-д 62 суудалтай МАН дангаараа хариуцлага хүлээнэ” хэмээсэн нь Засгийн газарт өөр намтай хамтрахгүй ээ гэсэн утгатай.

Бүр тодруулбал, Үндсэн хуулийн цэцэд өргөдөл гарган МАН-ынханд давхар дээл өмсөх үүдийг нь нээж өгсөн АН-ынхны Засгийн газарт хамтрах мөрөөдөл нь ирэх сонгууль хүртэл замхарч байна. Тэд үнэхээр Засгийн газарт орж ажиллах чин хүсэлтэй байгаа бол МАН-ын зараалаар Цэцэд өргөдөл бичээд хариу хүлээх бус, эв нэгдлээ сахиад ирэх сонгуулиар олонхи болох боломжоо л бүрдүүлэх ёстой болж байна.

О.Балдан-Очир