Засгийн газрын хуралдаанаас гаргасан шийдвэрийг танилцуулж байна. Энэ үеэр Хөгжлийн банкны зээлийн эргэн төлөлтийн талаар Сангийн сайд Б.Жавхлан мэдээлэл өглөө.

Тэрбээр "Засгийн газрын хуралдаанаар Сангийн яамны зүгээс хөгжлийн банкны ээлжит мэдээллийг орууллаа. Хөгжлийн банкин дээр байгаа төрийн өмчит компаниудтай холбоотой чанаргүй зээлийг шуурхай барагдуулах чиглэл өгсөн. Энэ үүргийн биелэлт үүргийн талаар танилцууллаа.

Өнгөрсөн нэг сарын хугацаанд 140-өөд тэрбум төгрөгийн чанаргүй зээл бэлэн мөнгөөр төлөгдлөө. Энэ бол бага тоо биш. Нийтдээ хөгжлийн банкны чанаргүй зээл 800 тэрбум төгрөгөөр барагдлаа. Энэ хэмжээгээр тус банкны тэнцэл сайжирч байна.

Эрдэнэс тавантолгой компани 117,3 тэрбум төгрөгийн зээлээ эргэн төлсөн. Үлдсэн 43 тэрбум төгрөгийг он гараад төлөхөөр хоёр талаасаа ойлголцлоо. Мөн МИАТ компани зээлийн үлдэгдэл 10 тэрбум төгрөгөө бүрэн төлж барагдуулснаар өргүй болж байна. ТОСК, НОСК-оос нийлж нэг тэрбум төгрөгийг төлж барагдуулсан. Ийм үр дүнтэй байна. Цаашид "Хөтөл цемент" болон "Эрэл", "Шинэ яармаг"-ийн зээлийг эргэн төлүүлэх тал дээр ажиллаж байна. Ойрын хугацаанд үр дүн гаргах төлөвлөгөөтэй байна. 800-д тэрбум төгрөг төлөгдсөн байна. Жилийн эцсээр нэг их наяд хүргэх зорилго тавиад ажиллаж байна. Эрэл компанийн зээлийн хувьд албадлагын арга хэмжээ авах буюу хууль хүчний байгууллагатай хамтарна" гэв. 

Д.Батчулуун