УИХ-ын чуулганаар ирэх оны төсвийн тухай хуулийн төслийг хэлэлцэж байна. Хуралдааны үеэр УИХ-ын гишүүн М.Оюунчимэг асуулт асууж, үг хэллээ.

Тэрбээр "Мөнгөний бодлого, төсвийн бодлого хоёрын маш зөв тохиргоо хийж байж өндөр инфляц, долларын ханшны өсөлтийг барьж чадах байх. Харин мөнгөний бодлогын баримт бичгээс харахад нүүрсний экспортыг 36 сая тонноор гаргаад явчихвал бодлогын хүүг бууруулаад нэг оронтой тоон дээр авааччих, эдийн засгийг 4,5 хувийн өсөлт дээр авчирчих бололцоо байна гээд ганц нүүрс яриад байна. Тэгсэн хэр нь нүүрсний статистик мэдээлэл буюу хэдий хэр хэмжээний ашиг олж байгаа зэрэг нь тодорхойгүй байна гэж Эдийн засгийн сайд нь ярьж байна. Мөн зэсийн экспорт дээр ямар бодлого барьж байгаа юм бэ. Эндээс хэдий хэмжээний ашиг олох шаардлагатай гэж бодож байна вэ.

Мөн бодлогын хүүг 12 хувьд хүргээд хатуу бодлого явуулна гэдэг чинь зээл хумьж байна. Зээл хумьж байгаа нь зах зээл рүү гарч буй мөнгө хумигдаж байгаа. Мөнгө хумигдаж байна гэдэг нь ажлын байр хумигдаж байгаа. Энэ нь ядуурал, ажилгүйдэлд нөлөөлөх үндэс болж байна.

2000-д онд хэрэгжиж, бодит жишээ болж байсан НҮБ-аас хэрэгжүүлж байсан “Макро финаннис” төсөл байна. Энэ төсөл маш амжилттай хэрэгжсэн. Тиймээс энэ итгэлцлийн зээлийн 2023 оноос хэрэгжүүлэх боломж байна уу. Өнөөдөр иргэд маань ажлын байрыг, ажлаа үнэлүүлэхийг, орлоготой байхын хүсэж байна” гэв.

Д.Батчулуун