УИХ-ын чуулганы нэгдсэн хуралдаан үргэлжилж байна. Гишүүдийн асуулт, хариултаас түүвэрлэн хүргэе.

УИХ-ын гишүүн Г.Амартүвшин: Өндөр үнэтэй суудлын автомашины импортод онцгой албан татвар нэмж оруулна гэсэн хүлээлт байсан. Жишээлбэл, 100 саяас дээш үнэтэй автомашины импорт нийт машины 35 хувийг эзэлж байна. Хэрэв онцгой албан татвар нэмбэл сайн хөшүүрэг болно гэж харж байгаа. Хоёрдугаарт, түгжрэлтэй холбоотой. Буруу талдаа хүрдтэй автомашины тоог хязгаарлахгүй гэвэл хэчнээн зам, гүүр бариад шийдэхгүй. Аль хэдийн улсын дугаараа авчихсан, хөдөлгөөнд оролцож байгаа автомашины тухай яриагүй. Шинээр импортоор орж ирэх машины тоог ярьж байна. Эдийн засгийн хөшүүргээр нь татварыг нь нэмээд тоог нь шат дараатай хязгаарлаад хэзээ нэгэн цагт буруу талдаа хүрдтэй автомашиныг импортлохыг зогсоох хэрэгтэй. Одоо хүртэл хос хөдөлгүүртэй, хайбрид автомашинууд импортын татварын хөнгөлөлт эдэлсээр ирсэн. Үүнийг эргэж харах цаг нь иржээ.

УИХ-ын гишүүн, Сангийн сайд Б.Жавхлан: Түгжрэл ихтэй газар авто тээврийн хэрэгслийн хэрэглээг хязгаарлана гэдэг түгжрэлийг бууруулах суваг мөн. Гэхдээ үүнийг маш сайн тооцоолж, судлах хэрэгтэй. Машин худалдаж авах, импортолж авч ирэх эрхийг нь хязгаарлахаас илүү авч ирсэн хойно нь  нийслэлд түгжрэл ихтэй газар хэрэглэхэд илүү үнэтэй байх ёстой. Өөрөөр хэлбэл Улаанбаатарын дугаар авахад, түгжрэл ихтэй бүсүүдэд унахад илүү төлбөр тавьдаг байх зохицуулалт нь зөв.

Жишээлбэл, хайбрид машин гэхээр олон нийтийн хэрэглээ болоод байгаа приус машин энэ жишээнд ороод явчихна. Тэгэхээр импортын татварыг тавьж энэ машиныг үнэтэй болгосноос түгжрэл ихтэй бүсүүдэд илүү үнэтэй унадаг байх зохицуулалт нь одоо цагт илүү оновчтой.

Шаталсан татварын тогтолцоог оруулж ирлээ, гэхдээ үнэтэй автомашинд импортын татвар нэмэх дээр бол зөв цаг хугацаа биш гэж үзсэн. 100-200 сая төгрөгийн хооронд байдаг том тээврийн хэрэгслүүд, өрхийн орлого нэмэгдэхгүй, буураад байгаа эдийн засгийн хүнд үед тэр автомашинууд орлого авч ирдэг болоод байна. Хөдөө явдаг, тэнд бизнес, аж ахуй эрхэлдэг тээврийн хэрэгслүүд их байна.

Зөвхөн тансаг хэрэглээнийхийг үзвэл 400-500 сая төгрөгөөс дээш үнэтэй байна. Гэтэл энэ нь орж ирж байгаа нь маш цөөхөн, орлого болоход хэтэрхий бага. Иймээс зөвхөн цалин дээр шаталсан татвар оруулж ирсэн" гэв.

Т.Мөнхжаргал