УИХ-ын чуулганы хуралдаан эхэллээ. Хуралдааны эхэнд УИХ-ын гишүүн Б.Пүрэвдорж үг хэллээ.

Тэрбээр "Монголын бүх ахмадууддаа энэ өдрийн мэндийг хүргэе. Өнгөрсөн 2022 оны хоёрдугаар сарын 1-ны өдөр УИХ-ын ээлжит бус чуулганаар тэтгэврийн доод хэмжээг 400-500 болгосон. Энэ мэдээ ахмадуудын хувьд сайн мэдээ байсан. Харин өнөөдөр Засгийн газар эдийн засгийн буруу удирдаж, Монгол банк мөнгөний бодлогыг зөв явуулаагүйн үндсэн дээр барааны үнэ нэмэгдэж, ханш унасан.

Ихэнх барааны үнэ 40-50 хувь өссөн. Энэ бол ахмадуудад хүнд цохилт болж байна. Тийм учраас ахмадуудын тэтгэврийг нэмэгдүүлэх хэрэгтэй. Шинээр тэтгэвэр авч долоон жилээр бодуулж байгаа хүмүүс бүрэн тэтгэврийн доод хэмжээ 500 мянга, хувь тэнцүүлсэн тэтгэврийн доод хэмжээ 400 мянган төгрөгийг авч байна.

Долоон жил тогтвортой ажил хийдэг хүн Монгол Улсад байхгүй. Тиймээс долоон жилээр биш таван жилээр тэтгэвэр тогтоох хуулийн төслийн яаралтай хэлэлцэж өгөөч хэмээн хүсэж байна. Энэ хуулийн ажлын хэсгийг яаралтай хуралдуулаад энэ хуулийг хэлэлцүүлж өгөөч. Ирэх оны төсөв дээр зургаан тэрбум төгрөг төсөвлөхөд л болох юм.

Хөшөө дурсгал босгож байхын оронд амьд бурхад ахмадууддаа хэдэн төгрөг харамлахгүй энэ хуулийг хэлэлцэж өгөөч хэмээн хүсэж байна. Албан тушаал бодсон хэдэн гөлийсөн нөхдүүд УИХ дотор суугаад байгаа шүү. Анхаараарай” гэв.

Д.Батчулуун