УИХ-ын чуулганы хуралдаан эхэллээ. Хуралдаанаар Монгол Улсын нэгдсэн төсвийн 2023 оны төсвийн хүрээний мэдэгдэл, 2024-2025 оны төсвийн төсөөллийн тухай хуульд өөрчлөлт оруулах тухай хуулийн төслийн талаар хэлэлцэж байна. Энэ үеэр УИХ-ын гишүүн С.Чинзориг асуулт асууж, үг хэллээ.
Тэрбээр "Төсвийн хүрээний мэдэгдэл тогтвортой байх ёстой үзүүлэлтүүд гэж боддог. Гэтэл сүүлийн үед өөрсдийнхөө үйл ажиллагаанд тааруулж өөрчлөөд яваад байна. Энэ бол зөв арга биш.
Жил бүр өөрсдийнхөө үйл ажиллагаанд тааруулаад яваад байх юм бол төсвийн хүрээний мэдэгдлийн суурь үзүүлэлтийг батлах ямар хэрэггүй болж байна. Цаашид үүнийг өөрчлөхгүйгээр тогтвортой баримтлах чиглэлээр ямар бодлого баримтлах ёстой юм бэ.
Хоёрдугаарт, төсвийн хүрээний мэдэгдэлд өөрчлөлт орсноор өрийн тааз 65 хувьд хүрэх юм байна. Одоо 51 хувьтай байгаа. Өрийн таазыг заавал ирэх жил 14 хувиар өсгөх шаардлага байгаа юм уу. Нөгөө талдаа ийм боломж байгаа бол гадаад зээлийнхээ өр зээлийг барагдуулах тал дээр ажилла.
Гуравдугаарт, өрийн тааз нэмэгдэхээр зарим гишүүдийн дунд болгоомжил үүснэ. Гаднаас зээл авах юм бол жилийн 8 хувиас доош хүүтэй зээл олдохгүй байх гэж бодож байна” гэв.
Д.Батчулуун
