УИХ-ын чуулганы хуралдаан эхэллээ. Хуралдаанаар Монгол Улсын нэгдсэн төсвийн 2023 оны төсвийн хүрээний мэдэгдэл, 2024-2025 оны төсвийн төсөөллийн тухай хуульд өөрчлөлт оруулах тухай хуулийн төслийн талаар хэлэлцэж байна. Энэ үеэр УИХ-ын гишүүн Ц.Цэрэнпунцаг асуулт асууж, үг хэллээ.
Тэрбээр "Эдийн засгийн байдал хүнд хэцүү байгааг бид бүгд ойлгож байгаа. Өрийн асуудал энэ жилийн төсөв дээр яригдаж байгаа асуудал биш. Сүүлийн арван хэдэн жил хураагдан өр ширийн асуудал бий.
Гаднын зээл тусламжгүйгээр явдаг зүйл байхгүй. Манайх шиг хөгжиж буй улс орнууд хөгжлийн зээлийг авч ашиглах хэрэгтэй.
Зээлийг бага хүүтэй олж ирэхийн тулд төсвийн сахилга баттай байгаа гэдгээ гадаадын хөрөнгө оруулагчдад харуулах хэрэгтэй. Төсвийн бодлогыг чангатгаж, хариуцлагатай төсөв батлах ёстой гэж харж байна. Гадаадын үнэлгээ хийдэг компаниудаас сайн үнэлгээ авах хэрэгтэй. Авсан зээлээ хөгжлийн төсөл хөтөлбөрт хөрөнгө оруулалт хийж байна уу үгүй юу гэдэг дээр УИХ хяналт тавьж ажиллах хэрэгтэй. Ажиллах хүчээ сайжруулах хэрэгтэй. Гаднаас орж ирж буй зээлийг зөв ашиглаж, үр өгөөжөө өгдөг байх хэрэгтэй. Мөн гадаадын хөрөнгө оруулагчдаа үргээмээргүй байгаа юм. Хэчнээн жил айлгаж хөөв. Үүнд цаашид анхаарах хэрэгтэй” гэв.
Д.Батчулуун
