УИХ-ын чуулган үргэлжилж байна. Хуралдаанаар Монгол Улсын 2023 оны төсвийн тухай хуулийн төслүүдийн хамт өргөн мэдүүлсэн хууль, тогтоолын төслүүдийг хэлэлцэж байна. Энэ үеэр УИХ-ын гишүүн Ё.Баатарбилэг үг хэлж, асуулт асуулаа. 

Тэрбээр "2020 онд Эрүүл мэндийн даатгалын тухай хуульд спортын магадлан итгэмжлэгдсэн байгууллагаар үйлчлүүлсэн хүмүүст нөхөн олговор өгөх асуудал яригдаж байгаад орхигдсон. Хөдөлмөрийн насны залуус эрүүл мэндийн даатгалын үр шимийг хүртэхгүй байна. Тиймээс спортоор хичээллэж, эрүүл мэнддээ анхаарсан хүмүүсийг дэмжих агуулга явж байгаа юм. Эрүүл мэндийн даатгалын сангаас эрүүл мэндээ анхаарч буй иргэдэд спортоор хичээллэхийг нь урамшуулах боломжгүй юм бол эрүүл мэндийг дэмжих сангаар дамжуулан хэрэгжүүлэх боломж бий юу? Олимп, спортыг хариуцсан сайд энэ асуудалд ямар байр суурьтай байна?

Эрүүл мэндийг дэмжих сангаас яагаад дэмжлэг үзүүлэх шаардлагатай гэхээр хөдөө орон нутагт улсын төсвийн хөрөнгө оруулалтаар шинээр заал, төв барихгүй гээд байна. Тиймээс хувийн хэвшил, төрийн байгууллагын хамтын оролцоог дэмжих чиглэлд анхаарах хэрэгтэй байна. 

Хүүхдийн мөнгийг 2023 оны төсөвт тодорхой хувиар бууруулж, 60 гаруй тэрбум төгрөгийг ирээдүйн өв санд төвлөрүүлэхээр болж байна. Энэ мөнгийг  хүүхдийн эрүүл мэнд, боловсрол руу зарцуулах боломж байхгүй юу? Ирээдүйн өв сангийн мөнгийг зайлшгүй  тулгамдсан хүнд үед хэрэглэнэ гэсэн. Одоо энэ цаг үе чинь ирчихээд байна" гэв. 

Д.Батчулуун