Монгол Улсын Ерөнхий сайд Л.Оюун-Эрдэнэ ХБНГУ-ыг зорихоор Улаанбаатар-Берлин-Франкфурт чиглэлд өчигдөр ниссэн. Харин Улаанбаатар-Франкфурт чиглэлд шууд нисэх хуваарьтай байсан онгоц тус айлчлалын багийг Берлинд буулгаад цааш Франкфурт руу ниссэн нь шүүмжлэл дагуулаад байсан юм. Уг асуудлаар Засгийн газрын хэрэг эрхлэх газрын дарга Д.Амарбаясгалан өөрийн цахим хуудсаар дамжуулж тайлбар өглөө. 

Тэрбээр "Монгол Улсын Eрөнхий сайд Л.Оюун-Эрдэнийн ХБНГУ-д хийж буй айлчлал нь тус улсын канцлер Ангела Меркель 2016 онд Монгол Улсад хүрэлцэн ирснээс хойшхи төрийн өндөр түвшинд хийж буй анхны айлчлал юм.

Энэхүү айлчлал нь Монгол Улсын гадаад харилцаа, олон улсын хамтын ажиллагаанд нэн өндөр ач холбогдолтой бөгөөд Төрийн хэмнэлтийн тухай хууль батлагдан хэрэгжиж байгаа үед тохиож байна.

Монгол Улсын Засгийн газар дээрх айлчлалтай холбогдон гарах зардлыг бууруулах хүрээнд тусгай үүргийн нислэг захиалахын оронд иргэний агаарын тээврийн нислэгт айлчлалын бүрэлдэхүүнийг багтаасан. Энэ нь зардлыг тав дахин хэмнэх ач холбогдолтой байсан юм.

Иймд иргэд, зорчигч та бүхнийг үүссэн асуудалд хүлээцтэй хандахыг хүсэхийн зэрэгцээ Монгол Улсын Засгийн газрын нэрийн өмнөөс хүлцэл өчиж байгааг хүлээн авна уу" хэмээжээ.

М.Сүхэхэй