УИХ-ын чуулганы хуралдаан үргэлжилж байна. Хуралдаанаа Мэргэжлийн болон техникийн боловсрол, сургалтын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцэж байна. Энэ үеэр УИХ-ын гишүүн Х.Булгантуяа үг хэлж, асуулт асуулаа. 

Тэрбээр "2017 оноос эхлээд жил болгон МСҮТ-д суралцаж буй оюутнуудад 200 мянган төгрөгийн тэтгэлэг олгодог болсон. Хэрэгжилтийн явцад учир дутагдалтай зүйл их байна. Жилд 60 гаруй тэрбум төгрөгийг Хөдөлмөр эрхлэлтийг дэмжих санд олгодог байсан. Үүнээс үлдэж байгааг МСҮТ-д сурч буй оюутнуудад зарцуулдаг байсан. Гэтэл ноос ноолуурын холбоо, сүүний холбоо зэрэг холбоодуудтай нь холбож өгөөгүй юм билээ.

Зах зээл дээр зарим холбоодуудад ажиллах хүн олдохгүй. Нөгөө талдаа зах зээлд эрэлт хэрэгцээтэй биш хүмүүсийг бэлтгээд байдаг. Зарим нь бүр МСҮТ-ээр мэргэшсэн хүмүүс байдаг юм байна. Тогоочоор сурч байгаад, гоо сайхнаар сураад, дараа нь хүнд машин механизмаар сураад явчихдаг юм байна. Мөн гэр бүлээрээ сураад тэтгэлэг авдаг юм байна.

Ноос ноолуурын холбоонд ажиллах хүмүүсийг бэлтгэе. Хүнсний салбар, барилгын салбар мөн ялгаагүй. Ажил олгогчдтой холбож өгөх хэрэгтэй. Өнгөрсөн тав, зургаан жилийн хугацаанд 300 тэрбум төгрөг зарцуулсан. Энэ хугацаанд хэчнээн хүнийг ажилд оруулж чадсан бэ" гэв. 

Д.Батчулуун