Монгол Улсын Ерөнхий сайд Л.Оюун-Эрдэнэ Холбооны Бүгд Найрамдах Герман Улсын Канцлер Олаф Шольцын урилгаар аравдугаар сарын 12-16-нд тус улсад айлчиллаа.

Эргэн сануулбал, аравдугаар сарын 12-ны өдрийн Улаанбаатар-Франкфурт чиглэлийн ОМ137 аяллаар Ерөнхий сайдын айлчлалын баг онгоцны чиглэл өөрчилсөн асуудлаар олны анхаарлын төвд эхэлсэн.

Харин энэ талаар МИАТ ТӨХК болон Ерөнхий сайд Л.Оюун-Эрдэнэ нар тайлбар мэдээлэл өгсөн. Ерөнхий сайдын мэдэгдэлд “"Бид МИАТ-ийн онгоцоор ирэхдээ шүүмжлэлд өртсөн. Уг нь 800  орчим сая төгрөгийн зардлыг 40 сая төгрөг болгож хэмнэсэн юм. Бид мэдээлэлдээ ойлголтын зөрүү гаргасан. Гэхдээ иргэдийн хандлага зөв учраас энэ бол бухимдах зүйл биш. Яагаад гэвэл чартер нислэгээр ирдэг байсан соёлыг энгийн байдлаар зохицуулдаг болж байна" хэмээсэн.

Тэгвэл тус айлчлалын онцлох үйл явдлаас дурдвал, Монгол Улсын Ерөнхий сайд Л.Оюун-Эрдэнэ, ХБНГУ-ын Холбооны Канцлер Олаф Шольц нар албан ёсны хэлэлцээ хийж хамтын ажиллагааг шат ахиулах шийдвэр гарлаа.

Тодруулбал,

• Хоёр улсын харилцааг Стратегийн түншлэлд хүргэх талаар тохиролцлоо.
• Газрын ховор элементийг хагас боловсруулах үйлдвэрлэлийг Монгол Улс, ХБНГУ-тай хэрэгжүүлж, судалгааны ажлыг хамтран эхлүүлэхээр тогтов.
• Шинэ сэргэлтийн бодлогын тэргүүлэх чиглэлүүдээр 1000 инженерийг Герман улсад үе шаттай бэлтгэхээр боллоо.
• Иргэдийн харилцан зорчих визийн хөнгөлөлт, шууд нислэгийн тоог нэмэгдүүлэх мөн Монгол судлал болон соёлын хамтын ажиллагааг идэвхтэй хөгжүүлэхээр талууд тохиролцов.
• Хоёр улсын Зорчигч, ачаа тээврийн албан ёсны хэлэлцээрийг ойрын хугацаанд байгуулахаар тохиролцов. Энэ хүрээнд нийтийн тээврийг евро стандартад шилжүүлэх асуудал яригдлаа.
• Шинэ сэргэлтийн бодлогын хүрээнд эрчим хүчний салбарын хөгжлийн хамтын ажиллагааг идэвхжүүлэхээр санал солилцов.

Т.Мөнхжаргал