АН-ын удирдлагын зөвлөлөөс Ерөнхий сайд Л.Оюун-Эрдэнэд дараах шаардлагыг хүргүүллээ. Үүнийг Нийслэлийн АН-ын дэд дарга А.Цэрэнбат уншиж танилцууллаа.

Тэрбээр, Монгол Улсын Үндсэн хуулийн 5.1-т зааснаар Монгол Улс дэлхийн эдийн засгийн хөгжлийн түгээмэл хандлага, өөрийн орны өвөрмөц онцлогт нийцсэн олон хэвшил бүхий эдийн засагтай байна, 5.4-т Төр нь үндэсний эдийн засгийн аюулгүй байдал, аж ахуйн бүх хэвшлийн болон хүн амын нийгмийн хөгжлийг хангах зорилгод нийцүүлэн эдийн засгийг зохицуулна, 19.1-т Төрөөс хүний эрх, эрх чөлөөг хангахуйц эдийн засаг, нийгэм, хууль зүйн болон бусад баталгааг бүрдүүлэх, хүний эрх, эрх чөлөөг зөрчихтэй тэмцэх, хөндөгдсөн эрхийг сэргээн эдлүүлэх үүргийг иргэнийхээ өмнө хариуцна хэмээн заасан. Өдрөөс өдөрт ард түмний эрх, эрх чөлөө хөндөгдөж, валютын ханш, өргөн хэрэглээний бараа бүтээгдэхүүний үнэ байж боломгүй нэмэгдэж, аж ахуй нэгж байгууллагууд олноороо дампуурч, хаалгаа барьж байгаад АН төдийгүй, Монгол Улсын нийт иргэд санаа зовж, сэтгэл гундуу, шүд зуун тэвчиж байна.

АН-ын Үндэсний бодлогын хорооны намрын анхны хуралдаанаар Монгол Улсын Засгийн газраас боловсруулсан 2023 оны төсвийн төслийг хэлэлцэж санал, дүгнэлт гаргалаа. МАН 2024 оны сонгуульд бэлтгэсэн төрийн эрх мэдлийг хууль бусаар авахад чиглэсэн луйврын төсөв болсон гэж бид санал нэгтэйгээр дүгнэлээ. Үүнд,

1. Ирэх оны төсвийг эргүүлэн татаж Үндсэн хууль болон холбогдох хуулийн хүрээнд ард түмний нийтлэг эрх ашигт нийцсэн төсвийн төслийг дахин хянаж өргөн барих,

а. Нэгдсэн төсвийн 19.6 их наяд бодит бус нийт орлого, татварын хэмжээг нэмэгдүүлэхгүй байх, иргэдэд дарамт учруулахгүйгээр бодит тооцоо хийх,

б. Төсвийн 1.5 их наядын алдагдлыг арилгаж, төсвийг тэнцвэржүүлэх,

в. Төсвийн хөрөнгө оруулалт, худалдан авалтаас авлига, хахууль авах боломжийг арилгаж, хөрөнгө оруулалтыг  хэсэгчлэн болон, бүрэн хэмжээгээр царцааж хэмнэгдсэн зардлыг цалин, тэтгэвэр нэмэгдүүлэх, гадаад өр барагдуулахад ашиглах,

2. Өргөн хэрэглээний бараа бүтээгдэхүүн, хүнсний ногоо, мах, гурил, будаа, шатахууны үнийн өсөлтийг тогтворжуулах, мэдэгдэхүйц түвшинд дорвитой бууруулах,

3. Шаталсан татварын хэмжээг нэмэгдүүлж, шинэчлэх асуудлыг зогсоох, нийт татварын хэмжээг иргэд, ААН, байгууллагын үйл ажиллагааг дэмжихэд мэдэгдэхүйц түвшинд хүртэл бууруулах, ипотекийн зээлийн асуудлыг хуулийн хүрээнд шийдвэрлэх, ЖДҮ-ийг хөгжүүлэх сан болон Хөгжлийн банкны зээлийн зарцуулалтыг хянаж буруутай этгээдүүдэд хариуцлага тооцож, зээл олголтыг нэмэгдүүлэх,

4. Төрийн албан хаагчид, ялангуяа эмч, сувилагч, багш болон үйлчилгээний бусад ажилтнуудын цалин, ахмадын тэтгэврийн хэмжээг бүх төрлийн бараа бүтээгдэхүүний үнийн өсөлт, инфляцын түвшинд уялдуулж нэмэх, хүүхдийн мөнгийг ялгаварлалгүй олгох,

5. Хүний эрх, эрх чөлөөг хамгаалах чиглэлээр Монгол Улсын нэр хүнд олон улсын түвшинд илтэд унаж, хүний эрхийн зөрчил улам бүр нэмэгдэж, хууль хүчний байгууллагууд илтэд эрх баригчдад үйлчилж байгаа бусармаг үйлдлийг таслан зогсоож хүний эрхийн чиглэлээр нэгдсэн бодлоготой, бодитой арга хэмжээ авч хэрэгжүүлж дараах албан тушаалтнуудад хариуцлага тооцох.

Үүнд, УИХ-ын дарга Г.Занданшатар, ЗГХЭГ-ын дарга Д.Амарбаясгалан, Сангийн сайд Б.Жавхлан, ХХААХҮ-ийн сайд Х.Болорчулуун, Монголбанкны ерхөнхийлөгч Б.Лхагвасүрэн, ЦЕГ-ын дарга Ж.Болд нарыг нэн даруй огцруулахыг шаардаж байна.

Шаардлагын хариуг аравдугаар сарын 19-ны дотор АН-д  албан ёсоор мэдэгдэхийг шаардаж байна. Хэрэв шаардлагыг биелүүлээгүй тохиолдолд АН-ын зүгээс бусад улс төрийн нам, олон нийтийн байгууллагууд, иргэдийн оролцоот эсэргүүцлийн жагсаал, ажил хаялтыг зохион байгуулах шат дараалсан тэмцлийн арга хэмжээг авна" гэв.

Т.Мөнхжаргал