Засгийн газрын хуралдаанаас гарсан шийдвэрийг танилцуулж байна. Энэ үеэр ЗГХЭГ-ын дарга Д.Амарбаясгалан мэдээлэл өглөө.

Тэрбээр "Мэргэжлийн хяналтын ерөнхий газрыг татан буулгана. Салбарын хяналт шалгалтын үйл ажиллагааг авч явах зорилготойгоор салбар салбарын яамд дээр хуваагдаж очиж ажиллана.

Үүнд орон тоо нэмэгдэх зүйл байхгүй. Мөн 300 гаруй орон тоо хэмнэгдэж байгаа.

Мэргэжлийн хяналтын байгууллага 1600 гаруй алба хаагчтай. Уг байгууллага байгуулагдсанаас хойш 20 жилийн хугацаанд тодорхой үүрэг гүйцэтгэн ажиллаж ирсэн. Мэргэжлийн яамдад давхардсан 1400 ажилтан ажилладаг нь ил болсон. Төр давхардсан хяналтаар хүндрэл учруулж байна хэмээн иргэдээс гомдол ирдэг. Үүний шалтгааныг бид олж харсан. Санхүүгийн зэрэг хяналтыг мэргэжлийн хяналтын байгууллага давхар хийж байна. Энэ нь олон нийт иргэдэд хүнд суртлыг үзүүлэх шалтгаан болсон гэж үзэж байна.

Мэргэжлийн хяналтын байгууллага нийт 26 чиглэлийн үйл ажиллагаа явуулдаг. Ийнхүү татан буулгаж, Хэрэг эрхлэх газар дээр шинээр Засгийн газрын дотоод хяналт шалгалтын агентлаг байгуулна." гэв.

Д.Батчулуун