Өнгөрсөн хавар Ерөнхий сайд Л.Оюун-Эрдэнэ мэдээлэл хийхдээ, “Тавантолгой дээр сүүлийн 17-20 жилийн хугацаанд аман дээрээс 60 орчим доллараар ачигдаад, хилийн цаана 120-180 ам,доллар болгодог. Энэ дундах  нүүрс 60-70 орчим ам.долларыг завшиж байсан бүлэглэлийг илрүүлэх ажлын хэсэг байгуулсан. Энэ далд эдийн засгийг цэгцлэхэд манай улсын ДНБ-ий хэмжээ хоёр дахин тэлнэ” хэмээсэн. Ерөнхий сайд ингэж мэдэгдсэнээс хойш хагас жилийн хугацаа өнгөрч байгаа ч “Нүүрсний” гэх хэргийн эздийг зарлалгүй өдийг хүрсэн.

Харин саяхнаас Эдийн засгийн хөгжлийн сайд Ч.Хүрэлбаатар нүүрсний бүх гэрээг ил болгоно хэмээн мэдэгдсэн нь Ерөнхий сайдын зургаан сарын өмнө хэлж байсан “Нүүрсний” гэх хэргийг ил болгох ажлын нэг хэсэг гэж харагдаж байгаа. Ингэхгүй бол олборлож байгаа ихэнх нүүрсээ урьдчилгааг нь авчихсан төлбөртөө өгөөд Монгол Улс руу валют орж ирэхгүй байгаа гэсэн таамаглал байгаа юм.

Яагаад таамаглал гэж байгаа гэхээр “Эрдэнэс Тавантолгой”-н ихэнх гэрээ нууцын зэрэглэлтэй байдаг учраас хэчнээн гэрээний хэчнээн хувьд нь хэдээр тооцож урьдчилгаа авсан гэдгийг шууд хэлэх боломжгүй.

Энэ бүхэнтэй холбогдуулсан уу, яасан уу Засгийн газрын гурван ч удаагийн хуралдаан дээр Ерөнхий сайд “Эрдэнэс Тавантолгой” ХК-ийн Гүйцэтгэх захирал Б.Ганхуягийг “ажлаа өг”, “зайлуул” гэж сануулжээ.

О.Балдан-Очир