АН-ын гишүүд мэдээлэл хийлээ. 

УИХ-ын гишүүн Д.Ганбат "АН-ын Үндэсний бодлогын хороо анхдугаар хурлаа хийж, ирэх оны төсвийн тухай хуулийн төслийг Засгийн газарт буцаах ёстой гэдэг шийдвэр гаргасан. Мөнгөний бодлого чангарч, төсвийн бодлого тэлсэн маягтай, нэг бодлого нь нөгөөгөө унагаасан байдалтай байгаа. Төсвийг цаашид алдагдалтай баталж болохгүй болсон ийм үед төсвийг алдагдалтай батлахаар оруулж ирсэн. Ард түмний амьдрал хэцүү, юмны үнэ өссөн ийм үед эрх баригчид бялуурсан, дарга нарыг тэжээдэг төсөв оруулж ирээд, батлах гэж улайран зүтгэж байгаа нь 2023 онд Монгол Улс дефолтод орох магадлал маш өндөр. Өнөөдөр долларын ханш хэдийнээ 3500 руу дөхсөн, албан ханш болон найман шарга зах дээр нэг ондоо гэсэн хоёр ханштай болсон байна.

МАН сүүлийн 6,7 жил эрх барьж байгаа. Энэ хугацаанд Үндсэн хуулийн нэмэлт өөрчлөлтийг Үндсэн хуулийн манаачид болон манай намын хэдэн нөхдүүдтэй нийлж хулгайн замаар яаж өөрчлөв. Ард түмнээс асуухгүй, сөрөг хүчингүй мэт, ард түмнийг үл тоомсорлосон. Олон дарга, сайд нартай, маш олон төрийн өмчийн компаниудтай хэр нь эмч, сувилагч, хилийн цэргийн цэргүүдийн цалинг хар. Үүнд МАН, болон Засгийн газар анхаарч ажиллах ёстой.  Монгол Улсын гадаад, дотоод нөхцөл байдал туйлын хүнд байна. Ийм нөхцөлд дээрх төсвийг баталж болохгүй. Олон сайд, 200 мянган төрийн албан хаагчийг цалинжуулсан, төрийн өмчийн компаниудыг тэтгэж, өр авлага нь гаарсан байна.

Хөдөө орон нутагт сав гурилын үнэ 100 мянгад хүрсэн. Гэтэл салбар хариуцсан сайд нь гурилын үйлдвэрийн эзэн “хамгийн хямд гурил, хамгийн хямд талх идэж байна” гээд л маргааш нь гурилын үнэ хөөрөгдөж байна. Энэ хүмүүстээ хариуцлага тооцох шаардлагатай. Ард түмний нуруун дээр найрлах төсвөө тэд үргэлжлүүлж байна. Ард түмэн босоход энэ айл тарахаар байна" гэв.

М.Сүхэхэй