УИХ-ын чуулганы нэгдсэн хуралдаан "Шүгэл үлээгчийн эрх зүйн байдлын тухай хууль"-ийн төслийг хэлэлцэж байна. Энэ үеэр УИХ-ын гишүүн Б.Энхбаяр байр сууриа илэрхийллээ. 

УИХ-ын гишүүн Б.Энхбаяр "Шүгэл үлээгчийн тухай хуулийг хэлэлцэхийг дэмжиж байгаа, гэхдээ энэ агуулгаар хэлэлцэхийг дэмжихгүй.

Нэгдүгээрт татварынхны талаар шүгэл үлээж болохгүй гэдэг заалтыг хасаж, татварынхны талаар харин ч шүгэл үлээх ёстой. Ямар татварын байцаагч акт тавьж, дарамталж авлига авч байгаа талаар яагаад хэнд ч мэдүүлэхгүй, тэндээ юм яриад байдаг юм бэ. Зөрчлийн хуулийн хяналтаас Х.Нямбаатар сайд оруулаад баталсан чинь Сангийн сайд татварынхныг хасаж байдаг.

Хоёрдугаарт нууц гэдгээр халхавчлах тухай. Гол нууц улсын нууцад байгаа. Ил байгаа мэдээлэл дээр шүгэл үлээнэ гэдэг, тэр дотроо мөнгө өгнө гэдэг зарчим сайн хэрэгжихгүй байх гэж бодож байна. Энэ сургаар зарим сайтууд би ийм мөнгө авах юм байна гээд тоо тавьчихсан байсан. Энэ бол шүгэл үлээгч биш шантаачжин, авлигачнаас дээрдэх юм ер байхгүй. Авлига авсан хэдэн төгрөгөөс нь хуваалцах гэж шантаачилж байгаа учраас энэ бол авлигачин гэсэн үг. Тиймээс үүнийг заагийг гаргаж, мөнгө өгнө гэдгийг учиртай хийх ёстой.

Гуравдугаарт, улсын нууцын тухай. Дэлхийд хамгийн том шүгэл үлээгч бол Жулиан Ассанже, Эдвард Сноуденд байна. Гэхдээ энэ хүмүүс тухайн улсдаа эх орноосоо урвагч, нууц мэдээлэл задлагчид байгаа. Үндэсний аюулгүй байдлын эрх ашгийн үүднээс улсын нууцтай харьцаж байгаа албан тушаалтнууд нууц мэдээллээр шүгэл үлээж болно гэвэл төрийн хар хайрцгийн бодлого алдагдах нигууртай. Тиймээс ямар асуудал дээр төрийн болон албаны нууцтай харьцаж байгаа этгээд шүгэл үлээх вэ, тэрийг хамгаалах вэ гэдгийг тодорхой болгох ёстой” гэв.

М.Сүхэхэй