УИХ-ын чуулганы нэгдсэн хуралдаанаар Хөдөлмөр, нийгмийн хамгааллын сайдаар УИХ-ын дэд дарга Т.Аюурсайханыг томилох асуудлыг хэлэлцэж байна. Харин тэрбээр дараах байр суурийг илэрхийллээ.

УИХ-ын дэд дарга Т.Аюурсайхан "Хөдөлмөр, нийгмийн хамгааллын яамд 3.5 сая иргэн, нийт айл өрхийн амь амьдралын асуудал байдаг. Тиймээс энэ салбарыг хариуцуулж ажиллах нь зүйтэй гэж Монгол Улсын Ерөнхий сайд Л.Оюун-Эрдэнэ санал болгоод одоо процессын ажил явж байна. Нийгмийн даатгалын багц хуулиуд хүлээгдэж байгаа. Үндсэндээ томоохон реформ хийхгүй бол нийгмийн даатгалын сан бол улстөрийн үзэмжээр дуртай өөрчлөлтүүд хийгдэж байдаг салбаруудыг дагаж тусдаа зохицуулалтууд хийгддэг. Мөн нийгмийн даатгалын сангийн төсөв байнга алдагдалтай явдаг асуудал бий. Тиймээс үүнд томоохон өөрчлөлт хийж энэ санг цаашдаа ил тод шударга ёсны зарчимд нийцсэн, ард иргэдийн нийгэм хамгааллын ажлыг зохистой шийднэ.

Сайдын суудал шагнал биш, хүнд, хариуцлагатай албан тушаалын үүрэг даалгавар хүлээж авч байна. 

Халамж хавтгайрсан гэдэгтэй санал нийлнэ. Хөдөлмөр, нийгэм хамгааллын яам “Халамжаас-Хөдөлмөрт” гэдэг бодлого баримталж ажиллаж байна. Бусад оронд нийгмийн халамж 1-2 хувь байдаг бол манайд долоо орчим хувийг эзэлж байна. Тиймээс зөвхөн зорилтот бүлгийн буюу зайлшгүй авах шаардлагатай хүмүүстээ халамжаа чиглүүлж, хөдөлмөр эрхлэлтийг дэмжиж, ажлын байраар хангах, өрхийн орлогыг дэмжих чиглэлээр томоохон бодлогын реформ хийх арга хэмжээ авна. Нийт иргэдийн 27.8 хувь ядуурлын түвшинд байна гэдэг бол сэтгэл эмзэглэм тоо. Тиймээс үүнийг огцом бууруулах, нөхцөл байдлыг бүрдүүлнэ” гэв.

Т.Мөнхжаргал