Эрчим хүчний сайд Б.Чойжилсүрэн сайдын ажилд томилогдоод хоёр сар болж буй. Тэрбээр сайд болоод салбартаа томоохон төслүүд хэрэгжүүлэхийг зорьсон ч төсөл хэрэгжүүлэх нөхцөл бүрдсэнгүй бололтой. Учир гэвэл манай улсын Эрчим хүчний салбар сүүлийн жилүүдэд алдагдалтай ажиллаж байна. Иймд тэрбээр энэ талаар авах арга хэмжээний талаар мэдээлэл өгөв. Түүний мэдээллээс онцлох таван эшлэлийг хүргэж байна. 

1. Эрчим хүчний салбар энэ жилийн хүлээгдэж буй гүйцэтгэлээр 200 орчим тэрбум төгрөг алдагдалтай ажиллах тооцоолол гарсан. Энэ жилээс тогтой байх уу, тоггүй байх уу гэдэг хүндрэл үүсэж байна. Ковидын үед эрчим хүчний салбар байж болох бүх нөөцөө ашигласан. Тиймээс энэ жил эрчим хүчний үнийн тариф нэмэхээс аргагүй нөхцөл байдалд хүрээд байгаа учир хүнд хэцүү шийдвэр гаргана.
2. Энэ оны арваннэгдүгээр сарын 1-нээс албан байгууллагын цахилгаан, дулааны үнийг нэмэгдүүлнэ. Үүнийг сайн зүйл гэж бодохгүй байна. Ахуйн хэрэглээнд бол нэмж чадахгүй байна. Тухайлбал, 5 мянган квт дооших бол 10 хувиар, 5 мянган квт дээш бол 28 хувиар тооцно. Энэ асуудлыг шийдэж чадвал 2022-2023 оны өвлийг давна.
3. 2023 оны хувьд эрчим хүчний салбар менежментийг сайжруулж, өртгөө бууруулах бүх боломжийг эрэлхийлнэ. Хөгжингүй орнууд ахуйн хэрэглээ өндөр ,ААН бага байдаг. Манай Улсад үүний эсрэг байгаа юм. Энэ салбарын дампууруулахгүйн тулд ийм арга хэмжээ авна.
4. Бид энэ удаад зөв зүйл хийх гэж яваа биш. Аргагүй эрхэнд энэ салбарыг дампууруулчихгүйн тулд дээрх арга хэмжээг авах гэж байна. Ерөнхийдөө уг нэмэлтээр 280 орчим тэрбум төгрөг орж ирэх тооцоо бий. Багануурын уурхай тонн нүүрсийг 35 мянган төгрөгөөр зарж байгаа. Өөрийнх нь өртөг 46,800 төгрөг. Шивээ-Овоогийн 29 мянган төгрөгөөр зарж байгаа нь алдагдал явааг харуулж буй.
5. Улстөрч хүний хувьд сайд болсноор салбартаа том төслүүд хэрэгжүүлэхийг зорьж, дараа нь үнэ нэмэхийг бодсон. Харамсалтай нь ажлаа аваад салбарынхантайгаа уулзахад “сайдаа та гоё юм яриад хэрэггүй, эхний ээлжид тарифыг нэмэгдүүлж, алдагдлыг бууруулаач ээ ” гэдгийг бүх түвшинд хэлж байна.

Д.Батчулуун