Өнгөрсөн УИХ-ын сонгуулиас хойш хоёр хуваагдаад байгаа АН өдгөө хоёр дарга, хоёр тамгатайгаар үйл ажиллагаа явуулж байгаа. Тамга атгаж байгаа дарга бүр нь өөрийгөө жинхэнэ дарга хэмээн мэдэгдэж, атгаж буй тамгаа хууль ёсных хэмээн мэтгэдэг.

Өөрсдийгөө хууль ёсны гэж нэрлэж байгаа дарга бүр нь албан тоот илгээхдээ АН-ын дарга, АН-ын ерөнхий нарийн бичгийн дарга хэмээн гарын үсэг зурж, тамга дардаг. Үнэндээ энэ хоёр АН-ын аль нь жинхэнэ АН гэдгийг ард иргэд бүү хэл, АН-ын гишүүд нь ч ойлгохоо больсон.

Нэг үгээр АН-ын тамганы будилаан АН-ын л дотооддоо учраа олох асуудал гэдэг нь цаг явах тусам тод болж байгаа. Ердөө хэдхэн хоногийн өмнө болсон ганц жишээг энд дурдъя.

Хуваагдаад, хоорондоо тамгаа булаалдаж байгаа хоёр АН хоёулаа ганцхан өдрийн зайтай ЗГХЭГ-ын дарга, МАН-ын генсек Д.Амарбаясгаланд албан тоот ирүүлсэн. Энэ дагуу нь Засгийн газрын Хэрэг эрхлэг газрын дарга, МАН-ын ерөнхий нарийн бичгийн дарга Д.Амарбаясгалан тус тусад нь шаардлагын хариуг нь хүргүүлсэн байдан юм.

Яг өөрсдийнх нь бичиж ирүүлсэн албан тоот дээрх албан тушаалаар хариу өгсөн гэсэн үг. Гэтэл өнөөдөр АН-аас Засгийн газрын Хэрэг эрхлэх газрын дарга Д.Амарбаясгаланд хандаж шаардлага хүргүүлжээ.

Уг шаардлагадаа ЗГХЭГ-ын дарга Д.Амарбаясгаланг "АН-ыг илтэд басамжлан доромжилсон" хэмээгээд огцрохыг шаарджээ. Уг нь АН-ыг Д.Амарбаясгалан басамжлан доромжлох бус, албан тоот дээрээ бичсэн албан тушаалаар нь л хариугаа өгсөн юм билээ л дээ. Товчхондоо Д.Амарбаясгаланд эхэлж хандсан нь АН өөрөө л юм.

Д.Батчулуун