УИХ-ын Үйлдвэржилтийн бодлогын байнгын хороо хуралдаж байна. Энэ үеэр Төр, хувийн хэвшлийн түншлэлийн тухай хуулийн төсөл болон хамт өргөн мэдүүлсэн хуулийн төслийг хэлэлцэж байна. 

УИХ-ын гишүүн Н.Алтанхуяг "Эрдэнэтийн овоолгыг ашиглаж байгаа үйлдвэрүүдэд үйлдвэр болоод улсаас ямар ч сонгон шалгаруулалт явуулдаггүй. Эрдэнэтэд хэн ноёрхлоо тогтоож байна, тэр хүмүүсийн ойрын хүмүүсийн компани зөвшөөрөл авдаг. Зөвшөөрөл гэхээс илүү гэрээ байгуулдаг. Бүх гэрээг нь үзсэн.

Ард түмний өмчийг хэн нэгний компанид нээлттэй сонгон шалгаруулж өгөөд “долоон жилийн дотор юмаа хий, үлдсэн нь ард түмнийх” гэхээр Үндсэн хууль зөрчиж байна гэдэг. Тэгвэл гурван хүн иддэг нь Үндсэн хууль зөрчихгүй байгаа юм уу. Хууль эрх зүйн дүгнэлтийг ямар захиалгаар гаргаад байгаа юм бэ. Ёс зүйг бодож энэ дүгнэлт гаргасан хүмүүстэй өөрөө очиж уулзаж, Тамгын газрынхантай хоёр цаг ярилцаад дүгнэлтээ эргэж харж болохгүй юу гэсэн. Тамгын газрын хүн даалгавартай юм шиг байгаа юм. Орж ирээд шууд үүнийг уншсан. Үндсэн хууль зөрчиж үү гэдгийг чи бид хоёр тогтоохгүй, Үндсэн хуулийн цэц бий.

Үүнээс цааш шинээр гарч ирэх компаниудыг нээлттэй шалгаруулаад явъя. Одоо байгаа компаниудаа өөрчлөөд зохион байгуулъя. Ингэхээр дөрвөн газар хожно. 34 хувиа авчихвал Монгол Улсын төсөвт мөнгө нэмэгдэнэ, Эрдэнэт 100 тэрбумаар хөрөнгө оруулалт хийдэг болно, Эрдэнэтийн иргэд нэг сая төгрөг авдаг болно, Хөрөнгө оруулагч өөрөө долоон жил ажиллаад хангалттай хэмжээний ашиг хийгээд гарна.  Ийм юм ярьж байхад гурван хүний хожил болгоод байгаа шударга бус үйлдлээ зогсоогооч. Юмны үнэ өсөөд хэцүү байхад яахаараа гурван хүн 50 сая ам.доллар иддэг юм бэ. Энэ тэгээд шударга ёс уу?" гэв.

М.Сүхэхэй