Засгийн газрын хуралдаанаас гарсан шийдвэрийг танилцуулж байна. Энэ үеэр  ЗГХЭГ-ын дарга Д.Амарбаясгалан "Эрдэнэс Тавантолгой" ХК-ийн талаар мэдээлэл өглөө.

"Эрдэнэс Тавантолгой" ХК-д онцгой дэглэм тогтоох асуудлыг Засгийн газраас ярилцаж, шийдвэрлэлээ. Дэглэм тогтоох нөхцөл байдал Монгол Улсын Засгийн газрын аравдугаар сарын 5-ны өдөр гарсан тогтоолын хэрэгжилтийг хангах чиглэлээр гарч байгаа. Тухайн тогтоолоор Эрдэнэт тавантолгой ХК-д 500 сая долларыг татан төвлөрүүлэх үүрэг чиглэл өгөгдсөн байдаг. Мөн Эрдэнэт Уулын баяжуулах үйлдвэрт 300 сая долларыг төвлөрүүлэх үүргийг өгсөн. Үүнтэй холбоотойгоор Тавантолгой компанид үүрэг чиглэл өгөх тогтоол гарсан.

Монгол Улсын Засгийн газрын тогтоол

Монгол Улсын Засгийн газрын тухай хуулийн 8 дугаар зүйлийн тав дахь хэсэг

Монгол Улсын Засгийн газарт эрх олгох тухай 1991 оны нэгдүгээр сарын 4-ны өдрийн тухай хуулийн нэг, хоёрдугаар зүйлд заасны дагуу тус тус үндэслэн Монгол Улсын Засгийн газраас тогтоох нь

Нэг. Төлбөрийн тэнцэл алдагдал өндөр байгаа өнөөгийн нөхцөлд гадаад валютын орох урсгалын нэмэгдүүлж, Засгийн газрын 2022 оны 362 тогтоолын хэрэгжүүлэх зайлшгүй шаардлагыг харгалзан “Эрдэнэс Тавантолгой” ХК-д зургаан сарын хугацаагаар онцгой дэглэм тогтоосугай.

Хоёр. “Эрдэнэс Тавантолгой” ХК-д тогтоосон онцгой дэглэмийн хугацаанд Монгол улсын засгийн газарт эрх олгох тухай хууль, энэ тогтоолд заасан арга хэмжээг авч хэрэгжүүлэн компанийн үндсэн үйл ажиллагаа, удирдлага зохион байгуулалт, төлбөр тооцоог нэмэгдүүлэх асуудлыг шууд хариуцан гүйцэтгэж, компанийг бүрэн төлөөлөх бүрэн эрх бүхий төлөөлөгчөөр Сангийн яамны Төрийн нарийн бичгийн дарга Ж.Ганбатыг томилон ажиллуулсугай.

Гурав. Онцгой дэглэмийн хугацаанд “Эрдэнэс Тавантолгой” ХК-ны үйлдвэрлэлийн үндсэн үйл ажиллагааг бүрэн хангаж, дор дурдсан арга хэмжээг авч хэрэгжүүлэхийг дараах албан тушаалтанд даалгасугай.

3.1 Компанийн бүтэц зохион байгуулалтыг оновчтой тогтоож шинэчлэх, шаардлагатай бол нэгжийн удирдлага, албан тушаалтныг томилж чөлөөлөхийг Засгийн газрын онцгой бүрэн эрхт төлөөлөгч Ж.Ганбатад

3.2 Компанийн хөдөлмөрийн болон үйлдвэрлэл технологийн тухайлан дүрэм, үйлдвэрлэлийн дүрэм, үйлдвэрлэлийн журам тогтоож тэдгээрийн зөрчигчдөд хариуцлага хүлээлгэн ажиллахыг Засгийн газрын онцгой бүрэн эрхт төлөөлөгч Ж.Ганбатад

3.3 Тавантолгой нүүрсний ордоос нүүрс тээвэрлэх худалдан борлуулах, хил нэвтрүүлэхэд хяналтыг сайжруулах арга хэмжээг тухай бүрд нь авч хэрэгжүүлэхийг Засгийн газрын онцгой бүрэн эрхт төлөөлөгч Ж.Ганбатад

3.4 Компанийн хөрөнгө оруулалт, бизнес төлөвлөгөөнд заасан зорилт арга хэмжээний хэрэгжилт үйл ажиллагаанд санхүүгийн иж бүрэн хамтарсан хяналт шалгалт хийж, дүнг Засгийн газарт танилцуулахыг Сангийн сайд Б.Жавхлан, Эдийн засгийн хөгжлийн сайд Ч.Хүрэлбаатар, Уул уурхай хүнд үйлдвэрийн сайд Ж.Ганбаатар, төрийн өмчийн бодлого зохицуулалтын газар Цэнгэл нарт

3.5 Гадаад валютыг нэмэгдүүлэх чиглэлээр авах зарим арга хэмжээний тухай Засгийн газрын 362 дугаар тогтоолын хэрэгжилтийг хангуулж ажиллахыг Засгийн газрын онцгой бүрэн эрхт төлөөлөгч Ж.Ганбатад

Дөрөв. Энэ тогтоолын хэрэгжилт, “Эрдэнэс Тавантолгой” ХК-д тогтоосон онцгой дэглэмийн үр дүн, явц байдлыг сар бүр Засгийн газрын хуралдаанд танилцуулж, тодорхой чиглэл авч ажиллахыг ЗГХЭГ-ын дарга Д.Амарбаясгаланд даалгасугай.

Тав. Тогтоолын 2022 оны аравдугаар сарын 26-ны өдрөөс эхлэн дагаж мөрдсүгэй" гэв. 

Д.Батчулуун