УИХ-ын чуулганы хуралдаан эхэллээ. Хуралдаанаар “Төрөөс мөнгөний бодлогын талаар 2023 онд баримтлах үндсэн чиглэл батлах тухай” Улсын Их Хурлын тогтоолын төсөл /Монголбанкнаас 2022.09.27-ны өдөр ирүүлсэн, анхны хэлэлцүүлэг/-ийг хийж байна. Энэ үеэр Монголбанкны ерөнхийлөгч Б.Лхагвасүрэн УИХ-ын гишүүн Баттөмөрийн асуултад хариулт өглөө. 

Тэрбээр " 2021 оны нэгдүгээр сард батлагдсан Банкны тухай хуулийн нэмэлт өөрчлөлтөөр системийн нөлөө бүхий таван том банк хөрөнгийн биржээр дамжиж, олон нийтэд нээлттэй хувьцаагаа арилжих үүрэг хүлээсэн. Төрийн банк олон нийтэд нээлттэй арилжаа хийлээ. Амжилттай болж дууслаа. Хувьцааг саналын хэмжээнээс гурав дахин өндөр санал ирж амжилттай явагдсан.

Энэ онд багтаагаад “Хаан”, “Голомт” банк IPO хийхээр бэлтгэж байна. Үлдсэн хоёр банк ирэх оны эхээр хийх байх.

2023 онд Монголбанк 21-22 тонн алт авахаар төсөөлөл хийж байна. Төсөөлөл яагаад тогтвортой байгаа вэ гэхээр ашигт малтмалын хайгуулын, олборлох лицензтэй холбоотой алтны олборлолтын хэмжээ огцом нэмэгдэж, буурах мэдээлэл байхгүй учраас дээрх хэмжээний алтыг худалдаж авах төсөөллийг хийсэн.

Ирэх онд өрийн төлбөр хийх томоохон хуваарьтай. Евро бондын 500 сая ам.долларыг ирэх тавдугаар сард, "Гэрэгэ" бондын 500 сая ам.долларыг 11 сард, Хөгжлийн банкны "Самурай" бондыг 12 сард төлөгдөхөөр тооцсон. Нийтдээ 1.3 тэрбум ам.долларын өр бий. Ялангуяа, 2023, 2024 он бол өр төлөх хүнд жилүүд юм" гэв. 

Д.Батчулуун