Улаанбаатар хотын цахим шилжилтийн төслүүдийг Хотын дарга УИХ болон Засгийн газрын гишүүдэд танилцууллаа.

Нийслэлийн засаг дарга бөгөөд Улаанбаатар хотын захирагч Д.Сумъяабазар "Цахим үндэстэн болохын тулд цахим хот байх ёстой. Улаанбаатар хотын түгжрэл, хүн амын эрүүл мэнд болоод хотын төлөвлөлттэй холбоотой 300 гаруй асуудлыг нэгтгэж 36 багц болгосноор мэдээллийн технологийн үндэсний компаниудыг оруулж хэрэгжүүлэх 27 багц асуудал бий. Эхний ээлжид 12 нь хэрэгжиж байна. Манай үндэсний компаниуд өөрсдийн хөрөнгөөр эх үүсвэрээ гаргаж, 1000 гаруй инженерийн оролцоотойгоор маш олон давуу талыг бодитоор бий болгосон.

Ингэснээр 2024 оны 12 дугаар сар гэхэд 27 багц ажлыг иж бүрэн явуулж, Улаанбаатар хот дижитал хот болсноо дэлхийд зарлах богино хугацаатай бөгөөд эрчимтэй төлөвлөлтийг хийж байна.

Аппликейшн бүтээгээд зардал өндөр гарсан зүйл байхгүй. Уул уурхай, дэд бүтэцтэй холбоотой бүтээн байгуулалтын зардлын дэргэд мэдээллийн технологийн зардал харьцуулашгүй бага. 100 гаруй тэрбумын эх үүсвэрээр Улаанбаатар хотыг иж бүрэн цахим болгох асуудал байхыг үгүйсгэхгүй, гэтэл энэ төсөл 23 тэрбумын эх үүсвэрээр явж байгаа. Үүн дээр нэмээд маш олон ажлын байр, давуу талыг авч ирнэ, авлигал бууруулна. Энэ бол хөгжлийн хурдасгуур, иргэдийн оролцоог Улаанбаатар хотод чиглүүлсэн бодлогын асуудал" гэв.

М.Сүхэхэй