УИХ-ын чуулганы өнөөдрийн хуралдаанаар хэлэлцэх асуудлуудыг танилцуулах үеэр үг хэлсэн Ц.Даваасүрэн гишүүн “2023 оны төсвийн тухай хуулийг дагасан хуулиуд  дотор нэг тогтоол байгаа. Тэр тогтоолын хоёрдугаар заалтад Хөгжлийн банкны гадаад зээлийн өрийг төр баталгаа гаргаж төлөх гэсэн заалт бий. Б.Жавхлан чи энэ заалтаа татаж аваарай. Чи хамгийн их Хөгжлийн банкийг үймүүлсэн  хүн шүү. Чиний менежер Мөнхбаяр зээлийн газрын дарга,чиний танил хүүхэн Уянга зээлийн санхүүжилтийн газрын захирал, Пүрэвсүрэн чинь “ДБМ Лизинг”-ийн захирал хийсэн шүү. Тэгээд “Хөгжлийн банк”-ны  40 гаруй тэрбум төгрөгийг тэр Батхүү захирал, эдний авгайтай цуг компанидаа хамтран эзэмшдэг. “Чингис хаан” банкийг эд нар эзэмшдэг гэсэн үг. Тэнд 40 гаруй тэрбум төгрөгийн хадгаламж байршуулаад өнөөдөр байхгүй. Үүнийг хэн төлөх юм бэ.  Хаана сан байна бүгд рүү нь гар дүрж байна. Ийм ёс зүйгүй байж болохгүй.

Хэрвээ Хөгжлийн банкны зээлийг төр баталгаа гаргаад төлчихвөл ард нь зээл авсан улстөрчид цэвэр үлдэх гээд байна. Тэгээд эцэст нь Хөгжлийн банкийг дампууруулах уу, экспортын банк болох уу.

Тэгээд өр барагдуулж байна гэсэн нэрээр байхгүй болж дампуурна. Ялангуяа энэ хуулийг өчигдөр байнгын хороогоор хэлэлцэж байхад Г.Амартүвшин чи 30 хэдэн тэрбумыг авчихаад  ичихгүй төрөөр баталгаа гаргаж төлүүлнэ гээд сууж байна. Чи УИХ-аас татгалзаад шалгуулна гэсэн яасан бэ. Шалгуулаарай чи.

Чамд УИХ-д суух эрх байхгүй шүү. Энэ мэт 10 гаруй хүмүүс энэ тогтоолын төслийг хэлэлцэхэд оролцохгүй байх ёстой шүү. Ирц хүрэхгүй байх. Гэхдээ УИХ гишүүд нь ийм байхаар нийгэм нь юу гэж хүлээж авах юм. С.Баярцогттой адилхан иймэрхүү нөхдүүд төрийн эрх барих байгууллагад сууж байна шүү дээ. Энэ хэвээрээ улстөрчдийн авсан зээлийг төр нь төлөөд байх юм бол дараа дараагийн сан, банкнууд чинь дампуурна” хэмээн бухимдлаа.

Л.Сайнаа