“Мобиком”, “Юнител”, “Скайтел”, “Жи-Мобайл” компаниуд нь “эхний нэг минутаас дотогш ярианы тарифийг нэг минутаар тооцож төлбөр авдгийг секундээр тооцдог болгох, дараа төлбөрт үйлчилгээний барьцаа төлбөрт хүү тооцож хэрэглэгчдэд олгох саналыг ШӨХТГ-т иргэд хүргэсэн билээ. Дээрх саналыг 2012 оны арваннэгдүгээр сарын 1-нээс эхлэн үйл ажиллагаандаа мөрдөхийг сануулсны дагуу өнөөдөр энэ талаар Мэдээлэл, шуудан, харилцаа, технологийн газраас мэдээлэл хийсэн юм. Хуралд ШӨХТГ-ын дарга О.Магнай, МШХХТГ-ын дарга Ц.Жадамбаа, “Мобиком” корпорацийн ерөнхий захирал Р.Арвинцогт, “Юнител” группийн ерөнхий захирал Р.Ганболд, “Скайтел” компанийн ерөнхий захирал Д.Болор, “Жи-Мобайл” компанийн ерөнхий захирал Д.Басбиш нарын хүмүүс оролцлоо
Монголд үйл ажиллагаа явуулж буй үүрэн телефоны оператор компаниуд ШӨХТГ-ын дээрх саналыг 2013 оны гуравдугаар сарын 1-нээс эхлэн үйл ажиллагаандаа мөрдөхөөр болжээ. Гэхдээ хэрэглэгчдийн хүсэлтээр гэдгийг тэд онцлов. Энэ арга хэмжээг “Мобиком”, “Юнител”, “Скайтел”, “Жи-Мобайл” гээд оператор компаниуд бүгд дор бүрнээ хүлээн зөвшөөрчээ.
Харин хэрэглэгчдийн барьцаа төлбөрт хүү тооцох асуудалд “Мобиком” корпораци үе шаттай арга хэмжээ авахаар болсон гэнэ. Эхний ээлжинд найдвартай, тогтвортой хэрэглэгчдийг барьцаа төлбөрөөс бүрэн болон хэсэгчилсэн байдлаар чөлөөлөх ажлыг ирэх сарын 1-нээс эхлүүлэхээр болжээ. Үүний тулд тухайн хэрэглэгч цахим үнэмлэхтэй байх шаардлагатай гэнэ.
Сэтгэгдэл (9)