УИХ дахь Ардчилсан намын бүлэг мэдээлэл хийлээ. Энэ үеэр Ардчилсан намын бүлгийн дарга О.Цогтгэрэл мэдээлэл өглөө.
Тэрбээр "Бүлгийн хуралдаанаар МАН-ын мөрийн хөтөлбөрийн хэрэгжилт болон Засгийн газарт хүргүүлэх албан шаардлагыг хэлэлцлээ. Монгол Улсын эдийн засгийн 40 хувь нь төсвөөр дагнадаг болсон. Үүнээс төрийн өмчит компаниудын борлуулалтын орлого 55 их наяд буюу Монгол Улсын дотоодын нийт бүтээгдэхүүнтэй тэнцэх хэмжээний борлуулалтын орлого хийдэг болсон.
Иймд УИХ дахь АН-ын бүлгээс Монгол Улсын Засгийн газарт нүүрсний гэрээтэй холбоотой долоон зүйл заалт бүхий албан шаардлага хүргүүлж байна.
Эрдэнэс Тавантолгойн нүүрсний олборлолт, худалдаа, офф-тейк гэрээний бүх мэдээллийг ил болгох, нүүрсний гэрээтэй холбоотой томоохон албан тушаалтнуудын мэдээллийг ил болго. Уг асуудалтай холбоотойгоор Ерөнхий сайд мэдээлэл бэлтгэж УИХ-д танилцуулах зэрэг шаардлагыг хүргэж байна. Дараа дараагийн хурлууд дээр үүний эсрэг тууштай явна гэсэн албан шаардлага байгаа юм.
Хоёрдугаарт, МАН-ын мөрийн хөтөлбөртэй холбоотой асуудлаар мэдээлэл өгөхөд эрх баригч нам сонгуулийн амлалтдаа авлигатай хатуу тэмцэнэ гэж амласан. Гэсэн ч авлига хээл хахуулийн хэрэгт нэр холбогдсон гишүүд, эрх баригчдын нэг нь ч хариуцлага хүлээгээгүй. Сүүлийн таван жилийн хугацаанд бид авлига, албан тушаалын хэргээр 35 байраар ухарлаа. Монгол Улсад авлига цэцэглэж байна.
И-монголиа төсөл 2015, 2016 оны үед эхэлсэн. Гэхдээ аливаа ажилд үр дүн гэж байх ёстой.
Монголын төр цахимжиж байгаа бол хүний оролцоо багасах ёстой, Монголын төр цахимжиж байгаа бол төр жижгэрэх ёстой.
Гэтэл цахимжлаа гэж төрийн зардал, төрийн албан хаагчийн тоо улам ихсээд байна. Эндээс харахад Монголын төр уриа лоозон төдий цахимжиж, бүтээмж нь дээшлэхгүй байна. Ам ажлын зөрүү ингэж гарч байна.
Төрийн хэмнэлтийн хууль баталсан хэдий ч Монгол Улсын 2023 оны төсөв ямар ч хэмнэлтгүй төсөв болсон. 18 их наядын төсвийг хэмнэсэн гээд ард иргэд итгээд байна. Харин 18 их наядын төсвийг хэмнэхээр эх баригчдынхаар бол хэмнээд 20 их наяд. 18 их наяд 20 болж нэмэгдэж байгаа нь хэмнэлт юм гэх логик харагдаж байгаа юм. Энэ бол маш харамсалтай" гэв.
Д.Батчулуун
