Төрийн ордонд УИХ-ын дарга Г.Занданшатар, УИХ-ын Төсвийн байнгын хорооны дарга Г.Тэмүүлэн, Сангийн сайд Б.Жавхлан, Засгийн газрын ХЭГ-ын дарга Д.Амарбаясгалан нар оролцож, Монгол Улсын 2023 оны Төсвийн тухай хууль болон бусад асуудлаар мэдээлэл хийж байна. Энэ үеэр ЗГХЭГ-ын дарга Д.Амарбаясгалан мэдээлэл өглөө.

Тэрбээр "Засгийн газрын хяналтын тогтолцоог бүрдүүлэх хууль батлагдсантай холбогдуулан Төрийн хэмнэлтийн тухай хуулийн хэрэгжилтэд хяналт тавьж ажиллах субъектийг Засгийн газрын зүгээс УИХ-д өргөн барихдаа тодорхойлох гэж үзэхэд хяналт тавьдаг байгууллага байхгүй байсан. Тухайн үед хэмнэлтийн хуулийг батлахдаа Сангийн яам санхүүгийн хувьд нь хяналт тавъя гээд зоож байсан. Тэгвэл цаашдаа төрийг илүү хариуцлагатай, төсөв мөнгөний хэмнэлттэй байх нөхцөлийн бүрэн хяналтыг тавьж, хариуцлага хүлээх байгууллага нь төрийн засгийн газрын хяналтын байгууллага болж хувирч байгаа юм. Хүний эрхийг хангасан бодлого, хууль тогтоомжийн хэрэгжилтэд хяналт тавина.

УИХ-аас жилдээ батлагдаж буй хуулийн тоо нэлээдгүй байдаг гэдгийг ард түмэн мэднэ. Гэхдээ батлагдсан хуулийн хэрэгжилтэд анхаарал тавьж буй байдал нь хангалттай сайн байж чаддаггүй. Тиймээс хуулийн хэрэгжилтэд хяналт тавьж, Засгийн газрын зүгээс санаачилга гарган хуулиудын хоорондын харилцан уялдааг сайжруулахад анхаарлаа хандуулна.

Төрийн хяналт, шалгалтын тухай хууль УИХ-аар батлагдаж, ирэх оны нэгдүгээр сараас хэрэгжиж эхэлнэ. Энэ хууль хэрэгжиж эхэлснээр Монгол Улсад хүчин төгөлдөр мөрдөгдөж буй хуулиар төрийн албан тушаалтнуудад хариуцлага тооцох боломж бүрдэнэ.

УИХ-аас удирдлага нь томилогддог ҮСХ, Аудитын газар, ХЭҮК гэх мэт байгууллагууд багтана. Эдгээр байгууллагуудад УИХ-ын харьяаны хяналтын байгууллага хяналт тавьж ажиллана. Харин Зэвсэгт хүчин, тагнуул, цагдаа, шүүх, АТГ, ЭСЯ-дууд зэрэг гадаад бодлого хэрэгжүүлэх чиг үүрэг гүйцэтгэдэг байгууллагуудын хэрэгжүүлж буй үйл ажиллагаанд Засгийн газраас шууд хяналт тавихгүй. Мэргэжлийн хяналтын байгууллагыг татан буулгахтай холбоотойгоор хяналтын тухай хуульд өөрчлөлт орсон" гэв.

Д.Батчулуун