Ардчилсан нам 2023 оны нэгдсэн төсөвт бүхэлд нь хориг тавих талаар Монгол Улсын Ерөнхийлөгчид хандан шаардлага хүргүүллээ.

УИХ-ын гишүүн Д.Ганбат "2023 оны төсөв маш их алдагдалтай, үрэлгэн төсөв баталлаа. Сүүлийн зургаан жил алдагдалтай төсөв баталсан. Зургаан жилийн өмнөхтэй харьцуулахад төсөв гурав дахин нэмэгдсэн ч ард түмний амьдрал гурав дахин сайжирсангүй, хоёр дахин уналаа.

Ирэх оны төсөв 19 их наяд 50 тэрбумын орлоготой, 20 их наяд 475 тэрбум төгрөгийн зарлагатай буюу 1.4 их наядын алдагдалтай төсөв баталлаа. Эрх баригчдын зүгээс, ирэх онд мөнгөний ханшийн уналт бага, инфляц 6-8 хувьд хүрнэ гэсэн боловч амьдрал дээр байхгүй байна.

Энэ сард мөнгөний ханш унасан байх жишээтэй. АН удаа дараа төсвийг эргүүлэн татах шаардлага тавьсан. Миний бие төсвийн тухай хуулийн төслийн хэлэлцүүлэгт оролцоогүй. Уг нь арваннэгдүгээр сарын 15-нд арай гэж амжиж төсвөө баталдаг, гэтэл сүүлийн өдөр маш хурдтай баталлаа. Ерөнхийлөгч төсөв батлагдсаны дараа ажлын тав хоногт төсөвт хориг тавих бүрэн боломжтой. Иймд бид Монгол Улсын Ерөнхийлөгч У.Хүрэлсүх төсөвт хориг тавих эрхээ эдлээч хэмээн хандана" гэв.

Т.Мөнхжаргал