УИХ-ын чуулганы нэгдсэн хуралдаан үргэлжилж байна. Хуралдаанаар Газрын ерөнхий хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлыг хэлэлцэж байна. Энэ үеэр УИх-ын гишүүн Г.Дамдинням үг хэлж, асуулт асуулаа. 

Тэрбээр "Төв аймаг дээр УИХ-ын тогтоолтой холбоотой асуудал байхгүй. 2016 онд Сэлэнгэ аймгийн Ерөө сум, Дархан-Уул аймгийн Хонгор сумын 9600 га газрын УИХ-ын тогтоолын нэрийг будилуулаад дээрэмдээд авчихсан. Тухайн үед газар нутаг дээрэмддэг, хэн том даргатай аймаг орон нутаг нь бусдыгаа дээрэлхэж, дээрэмддэг нь энэ хуулиар цэгцрэх юм уу.

Маш жижигхэн газар нутагтай Дархан-Уул аймгийн газар нутгаа дээрэмдээд аваад явчихсан. Одоо малчид ард иргэдийн хэрүүл зодоон болж байгаа асуудал байгаа. Энэ асуудал цэгцрэх үү. Улс орон даяар зөндөө маргаан байгаа. Сая бол ганцхан асуудал байгаа гэж худлаа л ярьж байна. 

Хоёрдугаарт, Дархан-Уул аймгийн хоёрдугаар багийн нутаг дэвсгэрт амьдарч байгаа 3000 орчим иргэн байна. Энэ иргэдийг ширээ нурууныхан гэж нэрлэдэг. Энэ газар дээр амьдарч байгаа иргэд нь Дархан-Уул аймгийнх. Газар нь Сэлэнгэ аймгийн Сайхан сумын нутаг дэвсгэр. Тэнд нийгмийн дэд бүтэц ерөөсөө байхгүй. Төсвийн хөрөнгө оруулалт тусгахад хэцүү байдаг. Хүн хаана амьдарч байна тэнд нь нийгмийн хэрэгцээгээ хүргэж явах нь төрийн зорилго баймаар байдаг. Гэтэл иргэд сонгогчдынхоо асуудлыг шийдье гэхээр газар нутгийн асуудлаас болоод чаддаггүй. Энэ асуудал шийдэгдэх үү” гэв. 

Д.Батчулуун