УИХ-ын чуулганы хуралдаан үргэлжилж байна. Хуралдаанаар Намрын ургац хураалт болон өвөлжилтийн бэлтгэл хангах чиглэлээр авч хэрэгжүүлж байгаа арга хэмжээний талаар хэлэлцэж байна. Энэ үеэр УИХ-ын гишүүн Н.Ганибал үг хэлж, асуулт асуулаа. 

Тэрбээр “Бидэнд шинэчлэлийн реформууд шаардлагатай байгаа. Хөдөө аж ахуйн салбар уламжлалт сэтгэлгээнээсээ салах хэрэгтэй. Саяхан 20,30,40 сая гээд арван жилийн өмнө 40 сая байсан мал өнөөдөр 70 саяд хүрсэн. Хөдөө аж ахуйн яам малчид сардаа хэдэн төгрөгийн орлого олж байна вэ гэдгийг мэдэж байна уу. Олж буй орлого нь амьдралд хүрч байна уу үгүй юу гэдэг нь энэ салбарын бодлого байх ёстой.

Манай газар тариалангийн салбар дэлхий дээр байдаг бүх л хөнгөлөлтийг авдаг. Харамсалтай нь өнөөдөр Монголчууд нийтээрээ хамгийн үнэтэй гурилыг идээд сууж байна. Энэ бодлого мөн үү? 

Салбарын өмнө тулгамдсан асуудлууд гээд тавигдсан байна. Харин хөдөө орон нутагт дизель түлш олдохгүй тав хонож байгааг салбарын сайд мэдэж байгаа юу? Малчид өвөлжөө рүүгээ түлшгүй нүүж чадахгүй байна. Асуудалд хоёр үзүүртэй зүү шиг ханддагаа Засгийн газар болимоор байна. Улс төрийн шийдвэр нь илүү гардаг. Мөн өгсөн тоо чинь бодитой биш байна” гэв.

Д.Батчулуун