Энэ оны нэгдүгээр ээлжийн цэрэг татлага өнөөдөр эхэлнэ. Цэргийн албанд 18-25 насны Монгол Улсын иргэн эрэгтэйчүүдийг татдаг. Сонирхуулахад, тайван цагт цэргийн жинхэнэ албанаас түр чөлөөлөх хэд хэдэн үндэслэлтэй.

Тухайлбал эцэг, эх нь хөдөлмөрийн чадваргүй, тэднийг харгалзах өөр хүнгүй, эхнэр нь хөгжлийн бэрхшээлтэй, 16-гаас доош настай дүүтэйгээ амьдардаг, хоёроос дээш хүүхэдтэй, эхнэр нь жирэмсэн гэх мэт шалтгаан цэргээс түр чөлөөлөгдөж болдог. Мөн цэргийн албанд эрүүл мэндээр тэнцээгүй иргэнийг тухайн жилд түр чөлөөлдөг юм байна. Тухайн иргэн цэргийн албыг хаагаагүйн төлөө мөнгөн хэлбэрээр цэргийн дүйцүүлэх албыг орлуулан хаана гэсэн хуулийн заалт байдаг. Энэ хууль 1971 оноос хойш төрсөн иргэдэд хамааралтай юм байна. Мөнгөн төлбөрийн хэмжээг Засгийн газар жил бүр тогтоодог аж. Энэ жил Засгийн газрын 101 дүгээр тогтоолоор 1982 оноос хойш төрсөн иргэд дээд тал нь нэг сая 150 мянга, доод тал нь 188.400 төгрөг төлөхөөр тогтоосон. 18-25 нас хүртлээ хүндэтгэх шалтгаангүйгээр цэргийн алба хаагаагүй бол нөхөн төлбөрийг бүрэн төлнө. Харин цэрэг татлагад хамрагдаад, чөлөөлөгдсөн жилийнх нь нөхөн төлбөр хасагдах юм байна.