Дэлхий дахинд хүн амын өвчлөлийн байдал өөрчлөгдөж хотжилт, амьдралын хэв маяг буюу хоол тэжээл, хөдөлгөөн, архи, тамхины хэрэглээтэй холбоотой халдварт бус өвчин /ХБӨ/-өөр өвчлөгсдийн тоо асар хурдацтай нэмэгдэж, нийгэм, эдийн засгийн хөгжил, сая сая хүний амьдрал, эрүүл мэндэд сөргөөр нөлөөлж байгаа нь нийгмийн эрүүл мэндийн тулгамдсан асуудал болж байна.

ХБӨ-ий шалтгаан болсон тамхи, архины хэрэглээ, эрүүл бус хооллолт, хөдөлгөөний хомсдол манай хүн амын дунд “чимээгүй тахлын” хэмжээнд хүрч манай улс тамхины хэрэглээний түвшингээр дэлхийд эхний аравт орж, хорь хүртэлх насны 4 хүний 1 нь тамхи татдаг, тамхины татвар бусад оронтой харьцуулахад маш бага, сурталчилгааг нь хориглосон хуулийн хэрэгжилт хангалтгүй байгаатай холбоотой юм. Тамхины хэрэглээ нь цаг бусын нас баралт, өвчин эмгэгийг үүсгэдэг урьдчилан сэргийлүүштэй хамгийн том асуудал юм.
МУ-д 2009 онд хийсэн “Халдварт бус өвчний эрсдэлт хүчин зүйлийн тархалтыг тогтоох” судалгаагаар 15-64 насны хүн амын 27,6%, эрэгтэйчүүдийн 48% буюу 2 эрэгтэй тутмын 1 нь, эмэгтэйчүүдийн 6,9% нь тамхи татаж байгаа нь 2005 оны судалгаатай харьцуулахад эмэгтэйчүүдийн тамхины хэрэглээ нэмэгдсэн байна. Нийслэлийн хэмжээнд нийт судалгаанд хамрагдагсдын 40,3% тамхи хэрэглэж үзсэн байна.
Ер нь манай улсад дам тамхидалтын түвшин өндөр байгаа нь олон судалгаагаар тогтоогдсон. 2009 оны судалгаагаар 2 хүн тутмын нэг буюу 42,9% нь гэртээ, 3 хүний нэг буюу 35,6% нь ажлын байрандаа дам тамихдалтанд өртөж байна. Түүнчлэн 13-15 насны сурагчдын 54,5% нь дам тамхидалтанд өртөж байгаа нь нэлээд өндөр үзүүлэлт юм.
Улсын ЭМ-ийн статистик үзүүлэлтээр уушигны хавдрын өвчлөлийн шинэ тохиолдол 2006 онд 10000 хүн амд 0,83 байсан бол 2011 онд 1.33, уушигны хавдраас шалтгаалсан нас баралт эрэгтэйчүүдийн дунд 2006 онд 10000 хүн амд 0,83 байсан бол 2011 онд 1.97 болж тус тус нэмэгдсэн байна.
Нийслэлийн ЭМ-ийн статистик үзүүлэлтээр уушигны хавдрын өвчлөл анх оношлогдсон тохиолдол 2006 онд 9,6 байсан бол 2011 онд 9,9 болж тус нэмэгдэж байгаа учраас тамхины хор хөнөөлийн эсрэг үйл ажиллагааг авч хэрэгжүүлэх зайлшгүй шаардлага тулгарч байна.
Мөн Монгол улсын Тамхины хяналтын тухай хууль, ДЭМБ-ын Тамхины Хяналтын Суурь Конвенц, Тамхины тахалын эсрэг бодлогын багц MPOWER-ыг хэрэгжүүлэх зорилгоор энэхүү “Тамхигүй Улаанбаатарыг бий болгох” сэдэвт салбар хоорондын шийдвэр гаргагчдын уулзалт зохион байгуулж байна.
Уулзалтын гол зорилго нь Тамхигүй УБ хотыг бий болгох Нийслэлийн ИТХ-ын шийдвэр гаргуулж, УБ хотыг Тамхигүй хот болгох төсөл хэрэгжүүлэх явдал юм.
Энэхүү уулзалтанд ЭМ-ийн дэд сайд Ж.Амарсанаа, НИТХурлын дарга Д.Баттулга, НИТХ-ын төлөөлөгч Г.Ганбаяр, Л.Нарантуяа, НЗДарга бөгөөд УБ хотын захирагч Э.Бат-Үүл, Нийслэлийн Засаг даргын Нийгмийн бодлогын зөвлөх Д.Батмөнх, ДЭМБ-ын ХБӨ-ий асуудал хариуцсан мэргэжилтэн С.Говинд, ММСС-гийн мэргэжилтэн С.Цэцгээ, БНХАУ-ын Тайваний Тайпэй хотын Ян Мин их сургуулийн багш, професоор Сонг Ли Хуанг болон бусад төлөөлөгч нар оролцож байна.