Өвөрхангай аймгийн аравдугаар тойргийн асуудлаас болж, МАН-ынхан Төрийн ордны дотор, гадна жагсаж байна. Ордон дотор жагсаал, цуглааныг “үзэн ядагч” Хууль зүйн сайд асан Ц.Нямдоржоос эхлээд Д.Лүндээжанцан, Д.Оюунхорол, С.Батболд, Ө.Энхтүвшин, Д.Хаянхярваа, Я.Содбаатар зэрэг намын удирдлагууд, харин гадна нь БСШУ-ны сайд асан Ё.Отгонбаяр нарын хүмүүс харагдаж байв. Тэр бүр ажлын байрандаа харагддаггүй залуу гишүүн О.Содбилэг, Н.Номтойбаяр нар хүртэл ах нарыгаа дэмжихээр ирсэн байлаа.
    Гэтэл намын генсек байсан, юм бүхний түрүүнд дуугардаг У.Хүрэлсүх гишүүн алга. Цагаан хоолой барьж, толгойдоо цагаан даавуу зүүж жагсаж байсан түүнийг намынхаа төлөө дуугарах болов уу гэж намын энгийн гишүүд нь харж байна. Гэтэл таг чиг.
    УИХ-ын гишүүн Г.Баярсайхантай зодоон хийснээс хойш олны нүдэнд өртөхгүйг хичээдэг болсондоо ч тэр үү Төрийн ордныг бүсэлсэн “МАН”-ынхан дунд тэр байсангүй. Түүнээс гадна Төрийн ордонд цаас барин идэвхитэй жагсагч гишүүдийн дунд Увс аймгаас нэр дэвшсэн Б.Чойжилсүрэн, Ч.Хүрэлбаатар хоёр ч харагдахгүй байгаа юм. Тэднийг өөрсдөө сонгуулийн асуудлаар Увс аймгийн ТЕГ-т шалгагдаж байгаа учраас энэ жагсаалд оролцохгүй байгаа хэмээн эх сурвалж мэдээллээ. Олон жилийн “ноёрхол”-ын дараа цөөнх болсон нам нь том алхам хийж, лидерүүд нь суулт хийж байгаа энэ үед намын генсек асан У.Хүрэлсүх хаачив?