Өвөрхангайн 10-р тойрогт УИХ-ын сонгуульд АН-аас нэр дэвшсэн Д.Зоригт, Г.Батхүү нарыг тангараг өргөхийг эсэргүүцэн МАН-ын гишүүд, дэмжигчид жагсаж байгаа билээ. Тэгвэл дөнгөж сая жагсагчдын шаардлагыг УИХ-ын гишүүн Н.Энхболд, С.Бямбацогт, Я.Содбаатар нар Ерөнхий сайд Н.Алтанхуягт өглөө. Уг шаардлагад Хан-Уул дүүрэг болон Өвөрхангай аймгийн шүүхийг эсэргүүцэж Г.Батхүү, Д.Зоригт нарыг тангараг өргүүлэхгүй байхыг хүссэн байгаа юм. Харин ерөнхий сайд Н.Алтанхуяг "Чуулганы танхимын үүд дарсан диванаа та нар зайлуулах хэрэгтэй. Өвөрхангай аймагт сонгууийн үеэр мөнгө төгрөг, архи дарс тараасан гэх маргаан үүссэн. Шүүхийн шийдвэрийг  СЕХ хэлэлцээд АН-ын хоёр нэр дэвшигч тангараг өргөнө гээд УИХ-ын даргад өргөн барьсан. Сонгуулийн маргаан бол УИХ-ын гишүүдийн ярьж явдаг зүйл биш. МАН-ын гишүүд УИх-ын даргын өрөөнд дайрч орсон бол өнөөдөр миний өрөөнд баахан камертай орж ирлээ" хэмээн бухимдсан юм. МАН-ын гишүүд энэ сарын 26 буюу ирэх баасан гарагт шаардлагын хариуг өгөхгүй бол тэмцлийн дараагийн хэлбэрт шилжинэ гэлээ.