УИХ-ын 2012 оны сонгуулиас хойш УИХ-ын даргыг сонгохоос эхлэн хууль дээдлэх, хуулийн дор бүгд эрх тэгш байх үндсэн зарчим бүрэн алдагдаж, хууль тогтоомжийг зөвхөн нэг намд ашигтайгаар өөрчилдөг, албан тушаалтан, сайд дарга нарын тоог хэт олшруулж, төрийн биш төрлийн нүсэр дарангуй бүтцийг өөрсөддөө зориулан бий болгож, монгол хүний амьдралд нэмэр болох нэг ч төгрөг улсын төсөвт суулгаагүй атлаа МУ-ын Ерөнхий сайд шинэчлэл нэрээр өөрийн мэдэлд 80 гаруй тэрбум төгрөгийг задаргаагүйгээр төсөвлөсөн зэрэг ноцтой, хууль зөрчсөн алдаа завхралыг гаргаж, ард иргэдийн итгэлийг уландаа гишгэж, тэвчишгүй хэмжээнд хүргэлээ.

    Төрийн албан хаагчдыг АН-ын гишүүн бус гэсэн үндэслэлээр хоморголон халж, ах дүү амраг саднаа эрээ цээргүйгээр хууль зөрчин томилж, төрийн алба, Засгийн газрыг хууль зөрчигчдийн үүр уурхай, бизнесийн бүлэглэл, олигархуудын оромж болголоо.

    Монгол Улсад ардчиллыг устгаж, хууль дээдлэх ёс, шударга ёсыг булшилж, шүүх, прокурор, цагдаа, авлигатай тэмцэх газар зэрэг хууль сахиулах байгууллагыг сөрөг хүчнээ дарах, айлган сүрдүүлэх АН-ын дарангуйллын зэвсэг болгон хувиргаж, Үндсэн хуулийн цэц, Сонгуулийн Ерөнхий Хороог өөрсдийн талд үг дуугүй үйлчилдэг болголоо.

    Түүний тод жишээ нь Өвөрхангай аймгийн сонгогчдын дийлэнх олонхийн саналыг авч Улсын Их Хурлын гишүүний түр үнэмлэхээ авсан С. Чинзориг, Ч. Төмөрхүү нарыг гэм буруутан мэт болгож, тэдний оронд Монгол Улсын олон хуулийг ноцтойгоор зөрчиж 168 сая төгрөг тараасан Г. Батхүү, Д. Зоригт нарыг Улсын Их Хурлын гишүүн болгохоор улайрч байна. Энэ бүх үйл ажиллагааг далдаас зохион байгуулж буй Ардчилсан намын дарга Н. Алтанхуягийг Монгол Улсын Ерөнхий сайдын үүрэгт ажлаас огцрохыг шаардаж байна.

    Монгол Улсын Үндсэн хууль, хууль тогтоомжуудыг онц ноцтой зөрчиж, УИХ-ын даргын албан тушаалыг хууль бусаар авсан З.Энхболдыг нэн даруй огцрохыг шаардаж байна.
Ардчилсан намын захиалгаар сонгуульд олон мянган саналаар ялагдсан Г. Батхүү, Д. Зоригт нарыг Улсын Их Хурлын гишүүн болгохоор өргөн мэдүүлсэн Сонгуулийн Ерөнхий Хорооны дарга Ч.Содномцэрэнг огцруулахыг шаардаж байна.
Мөн дээр дурдсан алдаа завхарлыг яаралтай засах арга хэмжээ авч Үндсэн хуулийн зөрчил бүхий нөхцөл байдлыг арилгаж, парламентат ёсны зөвшилцлийг эхлүүлж, улстөрийн намуудын хамтарсан ажлын хэсгийг яаралтай байгуулах санаачлага гарган ажиллахыг шаардаж байна.
Энэхүү шаардлагын хариуг 2012 оны 10 дугаар сарын 26-ны дотор өгч, биелүүлэхгүй бол тэмцлийн дараагийн хэлбэрт шилжих болохыг албан ёсоор мэдэгдъе.