Одоогийн байдлаар нийслэл хотод үйл ажиллагаа явуулж байгаа 11 худалдааны төв буюу зах байгаа бөгөөд үүний 10 нь задгай хэлбэрээр, 1 нь битүү болон задгай хосолсон хэлбэрээр үйл ажиллагаагаа явуулдаг байна.

Захууд хүн амд худалдаа үйлчилгээ үзүүлж, нийгмийн тодорхой хэсгийг ажлын байраар хангаж байгаа боловч хотын төвийн бүсэд  үйл ажиллагаа явуулж байгаа нь авто замын хөдөлгөөнд саад учруулж, түгжрэлийг бий болгодог нууц биш.  

Мөн  их  ашиг орлогын хойноос хөөцөлдөж, Нийслэл хотынхоо хөгжил цэцэрлэгжилт, хот тохижилтыг сайжруулах, ногоон байгууламж бий болгох, орчны  бохирдол хог хаягдлаас бүрэн ангижрах ажилд бодит хувь нэмэр оруулахгүй нийгмийн хариуцлага сул байгаа.

Иймээс цаашид үйл ажиллагаа явуулж буй захаас “Нарантуул” ОУХТөв, “Хар хорин”, “Да хүрээ”, “Өгөөмөр” зэрэг томоохон захуудыг хотоос гадагш шилжүүлэн байршуулах, Хотыг төвийн / А,Б  бүсэд/ худалдааны төв болон зах ажиллуулах зөвшөөрөл  нэмж олгохгүй байх, шинээр ашиглалтад орж үйл ажиллагаагаа эхлүүлэх  худалдааны төвүүд нь Нийслэлийн Засаг даргын захирамжаар зөвшөөрөл олгодог журмыг бий болгох нь зүйтэй хэмээн үзжээ.  

Өдгөө үйл ажиллагаа эрхэлж байгаа захуудын, түрээслэгчдийн эрх ашиг ноцтойгоор зөрчигдаж, энэ талаар ч амтай бүхэн хэлж ярьдаг хэдий ч одоогоор дорвиитой арга хэмжээ авсан нь үгүй. Тйимээс төрийн өмчийн газрыг түрээсээр эзэмшиж байгаа гэдэг утгаараа иргэддээ үйлчлэх зориулалттай аж ахуйн нэгж түрээслэгчдийн эрүүл мэндийн асуудал  ноцтой зөрчигдөж байгаа.

 
Тиймээс шинээр ажлын хэсэг байгуулж, цаашид захын барилга болон үйл ажиллагааны тодорхой стандартыг бий болгож, стандарт мөрдөхийг шаардах,  хэрэв стандартыг биелүүлээгүй бол газар эзэмших гэрээг нь цуцлах арга хэмжээ авах талаар анхаарлаа хандуулан ажиллах ёстой хэмээн Нийслэлийн захирагч Э.Бат-Үүл шийдвэрлэжээ.  Мөн нийслэлд ажиллаж байгаа бүх төрлийн захын үйл ажиллагаатай танилцан, холбогдох гэрээний биелэлтийг шалган, цаашид авах арга хэмжээний тухай санал боловсруулах ажлын хэсгийг Улаанбаатар хотын Ерөнхий менежер бөгөөд Захирагчийн ажлын албаны дарга Ч.Батаар ахлуулан байгуулах тухай Засаг даргын Захирамж гаргахаар болсон байна.