Зүүн Азийн улсуудтай тогтоосон бизнесийн харилцаа, хамтын ажиллагааг хөхүлэн дэмжих Британийн Парламент дахь бүх намын бүлэг Монгол Улсын Элчин сайд  Яам хамтран “Монгол Улсын эдийн засгийн хөгжил, худалдаа, хөрөнгө оруулалтын орчин” сэдэвт мэдээллийн уулзалт-үдийн зоогийг тус улсын Парламентын ордны Черчилийн нэрэмжит танхимд энэ оны аравдугаар сарын 16-ны өдөр зохион байгуулав.

Монгол Улсын нийгэм-эдийн засгийн байдал сайжирч, ДНБ-ийн өсөлт түргэн хурдацтай нэмэгдэхийн хэрээр хоёр орны харилцаа, хамтын ажиллагаа худалдаа, эдийн засаг, хөрөнгө оруулалтын салбарт өргөжин хөгжих  боломж нэмэгдэж байгааг Британийн улс төрчдөд танилцуулахад тус дөхөм үзүүлсэн энэхүү арга хэмжээнд Парламентын  Нийтийн танхимын гишүүд, Лордууд, Гадаад хэрэг, хамтын нөхөрлөлийн яам, Монгол Улстай харилцдаг болон шинээр холбоо тогтоож хамтарч ажиллахыг сонирхож байгаа пүүс компани, худалдаа-аж үйлдвэрийн танхим, их сургуулийн төлөөлөл зэрэг 50 орчим хүн оролцов.

Парламентын Лордын танхимын гишүүн Вэйнийн санаачилга, идэвхтэй оролцоотойгоор зохиогдсон энэ удаагийн мэдээллийн уулзалт-үдийн зоогийн үеэр Элчин сайд Б.Алтангэрэл Монгол Улс эдийн засаг, түүний дотор  уул уурхайн үйлдвэрлэлийн өндөр хурдацтай өсөлтөд гадаад хамтын ажиллагааны үр өгөөж, уул уурхайн салбараас олсон орлогыг  боловсрол, эрүүл мэнд, дэд бүтэц зэрэг  бусад  салбарт хөрөнгө оруулах, байгаль орчныг хамгаалах, сайн засаглал, ил тод байдлыг хөгжүүлэхэд түлхүү  төр, засгийн газар түлхүү анхаарч, томхон төсөл хөтөлбөрийг хэрэгжүүлж эхлээд байгаа тухай мэдээлэв.

Монгол Улсын эдийн засаг хувийн хэвшлийн гүйцэтгэж байгаа үүрэг оролцоо өсөн нэмэгдэж, үйл ажиллагааны нь цар хүрээ өргөжин тэлж буй талаар МCS компанийн Дэд ерөнхийлөгч Ж.Од, Британийн талаас хоёр орны харилцааг хөгжүүлэхэд анхаарч тодорхой ажлуудыг хийхээр төлөвлөж байгаа тухай ГХХНЯ-ны Ази, Номхон далайн газрын дэд захирал Ч.Дэвис нар ярьснаас гадна оролцогчдын  сонирхсон асуултад  дэлгэрэнгүй хариулт өгөв. Эх сурвалж http://www.info.mn