Сандал цуглуулах дуртай Г.Ундармаа
“Шинэ үе” продакшны жүжигчин Г.Ундармаа маш хачин хоббитой. Тэрбээр сувенирийн жижиг сандал цуглуулах дуртай аж. Түүний цуглуулгад янз бүрийн этгээд загвартай сандал байдаг гэнэ. Г.Ундармааг сандал цуглуулах дуртайг нь түүний найз нөхөд андахгүй бөгөөд ямар нэгэн баяраар дандаа жижиг сандал бэлэглэдэг аж. Түүний хувьд гадаад руу явах бүртээ шинэ, шинэ сандал худалдаж авдаг бөгөөд хамгийн үнэтэй сандлаа 50 ам.доллараар худалдаж авч байжээ.

    Ш.Наранчимэг торны хоббитой
Улсын дуурь бүжгийн эрдмийн театрын гоцлол дуучин, Соёлын тэргүүний ажилтан Ш.Наранчимэг нь тор цуглуулах дуртай гэнэ. Тэрбээр чамин торонд дурладаг байна. Тэрбээр “Мэдэхгүй ээ, яагаад ч юм би тор цуглуулах дуртай. Хүн муухай тор барьчихсан явах муухай харагддаг. Би янз бүрийн гоё тортой. Манай гадаадад байдаг эгч хүртэл миний цуглуулгад нэмэрлэх гээд баахан тор явуулдаг. Театрынхан маань ч Нараа дандаа гоё, гоё тор барьдаг гэдэг юм. Ер нь би гадуур муухай тор барьчихсан хүн харагдвал санаа зовоод өөрийнхөө торыг өгчихдөг юм.

    “Гурван бүдүүн” хамтлагийн ахлагч А.Мөнгөншагай виски цуглуулдаг
Хоёр, гурван жилийн өмнөөс  түүнд хүмүүс  виски бэлэглэдэг болжээ. Тэрбээр өөрөө архи, тамхи хэрэглэдэггүй болохоор гэртээ хадгалчихдаг  байж. Сүүлдээ вискинүүд нь гоё харагдаад цуглуулмаар санагдаад гадаад явахаараа л виски авчирдаг болсон гэдэг.  Мөн хүмүүс ч виски бэлэглэсээр л.... Одоогоор 60 гаруй вискитэй болчихсон байгаа.  Цуглуулга нь бүр ихдээд ирвэл вискинүүдээ дуудлага худалдаанд оруулдаг ч юм уу гэж бодож байгаа гэнэ шүү хүмүүс ээ!

    Б.Лхагвасүрэн шүдэнз цуглуулах хоббитой
Ардын уран зохиолч Б.Лхагвасүрэн гуай ажлын ширээнийхээ ард сууж, бүтээл юугаан туурвиж байх завсраар багахан сатаарч, сонирходог саваагүй зан нь шүдэнз, галын асаагуур аж. Хүний орчлонгийн хамгийн дээд шүтээн галыг өлзий дэмбэрэлтэй хэмээн билэгдэж, нэлээд хэдэн жилийн өмнөөс эхлэн цуглуулах болсон тэрбээр анхаарал татсан содон хийц, сонин зурагтай, өвөрмөц асаагуур болон шүдэнз харвал шуудхан л худалдаад авчихдаг юм байх. Хориод жил цуглуулсан түүний шүдэнз одоо бүр 4000 гаруйд хүрчээ.

    УИХ-ын дарга З.Энхболд сэнжтэй аяга цуглуулдаг
 УИХ-ын дарга Зандаахүүгийн Энхболд сэнжтэй аяга цуглуулах хоббитой гэнэ. Тэрбээр шүүгээ дүүрэн өнгө өнгийн, янз бүрийн логотой сэнжтэй аяга цуглуулдаг. Энэхүү цуглуулгынхаа тухай “ Хүний цуглуулга ч гэсэн ашигтай л байх хэрэгтэй. Аяга өөрөө дээшээ харсан сав. Цай хоол идэж ууж болно, хэн ч ирсэн гаргаад юм хийгээд ширээн дээр тавьчихна. Тиймээс л би аяга цуглуулдаг юм” хэмээн ярих дуртай.