Элэгний Д вирустэй иргэдийн уулзалт болж, вирусийг эмчлэх эмийг импортлохтой холбогдуулан өнөөгийн нөхцөл байдал, эрх зүйн орчин ямар байгаа талаар мэдээлэл өгч байна. Энэ үеэр УИХ-ын гишүүн Ж.Чинбүрэн мэдээлэл өглөө. 

Тэрбээр “Засгийн газар 2023, 2024 онд Элэг бүтэн Монгол хөтөлбөр юу хийх вэ гэдгээ төлөвлөх ёстой. Ялангуяа шинэ сайдтай энэ талаар дэлгэрэнгүй ярилцаж бид ойлголцсон. Эрүүл мэндийн яамны эмнэлгийн газрын даргатай тусгайлан хоёр ч удаа уулзаж “Элэг бүтэн Монгол” төсөлд 13,5 тэрбум төгрөгийг яаж хэрэгцээтэй хүнд нь хүрч зөв ашиглах талаар төлөвлөгөөгөө гаргаачээ гэдэг дээр санал бодлоо солилцсон. Дараагын асуудал засгийн газар патиентыг нь эзэмшиж байгаа Америкийн компанитай үнэ бууруулах хэлэлцээрт орох ёстой.

Та бүхэн санаж байвал элэгний С вирусын эмийг Монгол улс 2016 онд “Элэг бүтэн Монгол” хөтөлбөрөө эхлүүлээд 2017 онд Засгийн газар хэлэлцээр хийж 99,9 хувийн хөнгөлөлттэй үнээр авсан. Энэ өвчлөл зах зээлдээ сарын эмчилгээ нь 90 мянган доллар байдаг. Одоо 60 мянган доллар болж буурсан. Энэ эмчилгээг бид 99,9 хувийн хөнгөлөлттэй авч чадсанаар иргэддээ санхүүгийн дарамтгүй, үнэ төлбөргүй хийж чадсан.

Яг энэ жишгээрээ D вирусын эмчилгээг хийхгүй бол D вирусын эмчилгээ маш үнэтэй. Германд D вирусын сарын эмчилгээ нь 10 мянган евро, ОХУ-д эмчилгээний өртөг бараг гурван мянган доллар. Энэ эмчилгээ өдөр бүр, бүтэн жил хийгддэг. Энэ нь асар их өртөгтэй учраас Засгийн газар хэлэлцээрт орж үйлдвэртэй нь харилцан C вирусын эмчилгээ шиг яаж хямдхан авах вэ гэдгээ бодох ёстой. Энэ ажлыг хурдлуулах шаардлага, шахалтыг бид бүгдээрээ үзүүлэх ёстой.

Дэлхий даяар D вирусын тархалт C вирусын бодвол цөөхөн. Дэлхийд 15 сая хүн D вирустэй гэж үздэг. Дэлхийн нийт хүн амтай харьцуулахад 15 сая гэдэг нь бага тоо. Гэхдээ Монгол улс бол тархалтын улаан цэг.

Нийт хүн амаас 150 гаруй мянган иргэн D вирусын халдвартай байх боломжтой. Их хурлаас төсвөө баталснаар боломжийн зүйлийг хийлээ гэж харж байна. Амаргүй хэлэлцээрийг хийж энэ эмийн үнийг бууруулах ажлыг хийж Монгол улсдаа түргэвчилсэн байдлаар эхлэх нь зүйтэй гэдэг байр суурьтай уулзалтаа хийх гэж байна. D вирусын эмчилгээнд “Бюлервиртид” гэдэг эм сайн үр дүнтэй байна гэдэг нь батлагдсан. Монгол иргэд ОХУ-аас эмээ аваад эмчлүүлж байгаа 200 гаруй иргэд байна. Энэ эм сайн үр дүнтэй, гаж нөлөө байхгүй байгаа учраас энэ эмийг түргэвчилсэн байдлаар яаралтай монгол улсад нэвтрүүлэхээс өөр арга байхгүй” гэв.

Б.Мичидмаа