Кубын хуучин удирдагч Фидель Кастрогийн тархинд цус харважээ. Тэрээр хоол идэж, ярьж бараг чадахгүй байгаа төдийгүй хүн танихаа болсон байна. Энэ талаар Венесуэлийн эмч Хосе Маркина “EI  Nuevo Herald”  сонины сурвалжлагчтай ярилцахдаа хэлжээ. Өдгөө 86 настай Кастро хэдэн долоо амьд явж чадах ч олны өмнө дахин  үзэгдэхгүй л болов уу гэжээ. Түүний хэлснээр, Фидель Кастро их тамир тэнхээгүй болсон учир зохих эмчлгээ хийлгэж чадахгүй байгаа аж. Кастрогийнх шиг ийм шинж тэмдэгтэй хүмүүс амьсгалын дутмагшил, эсвэл халдварт өвчнөөр нас бардаг байна. Гэвч Кастрог хиймэл амьсгалын аппарат болон эмнэлгийн бусад багаж хэрэгсэлд залгаагүй ажээ. 
    Ромын пап ХVI Бенедиктийг Кубад очсон 2012 оны гуравдугаар сард Фидель Кастро  сүүлчийн удаа олны өмнө харагдсан юм. Зургадугаар сараас тэр сонины уламжлалт буланд юм бичихээ больжээ. Энэ сард Венесуэлийн Ерөнхийлөгчийн албан тушаалд улиран сонгогдсон  өөрийн анд, социалист Уго Чавест баяр хүргээгүй юм.  Одоогийн байдлаар Кубын Засгийн газар Кастрогийн биеийн байдлын талаар ямар ч мэдэгдэл хийгээгүй байна. Тэр 2006 онд мэс засал хийлгэсэн нь л лавтай бөгөөд  гэхдээ түүний өвчний шалтгаан, шинж чанар тодорхойгүй байгаа юм.
    Кубын хувьсгалын удирдагчийн бие сүрхий муудсан тухай мэдээ түрүүнд нь олон нийтийн мэдээллийн хэрэгсэлд байнга гарч байсан билээ. Зарим мэдээгээр, тэр удаан хугацааны туршид үхлийн ирмэгт байгаа ажээ. Хорт хавдартай гэж оношлогдож байсан Венесуэлийн удирдагч Уго Чавесын биеийн байдлын тухай мэдээ надад бий гэж 2011 онд мэдэгдсэнийхээ дараа доктор Хосе  Маркинаг хүмүүс мэдэх  болсон юм. Ассошиэйтед пресс агентлагийн тэмдэглэснээр, Чаваесын биеийн байдлын тухай Маркинагийн өмнөх  таамаглал нотлогдоогүй байна.