Хөгжлийн банктай холбоотой Нотлох баримтыг шинжлэн судлах хоёр дахь шатны сонсгол үргэлжилж байна. 

Өнөөдрийн сонсголоор Улсын төсвөөс эргэн төлөгдөх нөхцөлтэйгөөр санхүүжүүлсэн төсөл, арга хэмжээний хэрэгжилтийн талаар хэлэлцэж байна. 

Энэ үеэр УИХ-ын гишүүн Т.Доржханд гэрч Эдийн засгийн хөгжлийн яамны сайд асан Н.Батбаяраас асуулт асууж, хариулт авлаа.

Т.Доржханд: Яагаад Солонгосын менежментийн багийг явуулчихсан юм бэ? 

Н.Батбаяр: 2012 онд сайдын ажлыг хүлээж авсан. Ингээд Хөгжлийн банк сангийн яамны харъяанд ирсэн. 2013 онд тэр багийг өөрчилсөн. Бүтэн нэг жил ажиллуулсныхаа дараа шүү. Асар их мөнгөтэй байсан хэрнээ тэр банк алдагдалтай ажилласан. Тийм учраас өөрчилсөн. 

Т.Доржханд: Сангийн яаман дээр төсөл, ТЗҮ байдаггүй. Гэтэл тухайн үед 1,5 доллараар хөгжлийн санхүүжилтийг хийнэ гээд босгосон. Тухайн үеийн хүү бага байсан. Төсөл бэлэн болоогүй байхад мөнгөө авчраад, тоолуур ажиллаад байдаг. Төсөл байхгүй болохоор янз янзын төсөл рүү санхүүжүүлчихсэн юм байна гэх ойлголт эдийн засагч нарт бий. Төсөл бэлэн байсан уу? 

Н.Батбаяр: Монгол Улс хүнд байдлаас гарахын тулд санхүүгийн эх үүсвэр хэрэгтэй гэж үзсэн учраас бонд босгосон. Бэлэн байсан төсөл ч бий, бэлэн байгаагүй төсөл ч бий. Мөнгөө бий болгож байж мөнгөн дээрээ ажиллая хэмээн бодож бондоо босгосон. Мөнгөө түрүүлж босгоод ажилаа хийж эхэслсэн.

Чингис бондын мөнгө орж ирэхэд нь Монголбанканд байршуулаад, хүүний алдагдалгүй байх нөхцөлийг бүрдүүлж ажиллаж чадсан. 

Т.Доржханд: Таны оруулж ирсэн доллар чинь буцаад гарчихсан шүү дээ. Зөв ажил хийсэн гэсэн ч зөв ажил чинь эргээд долларынхаа ханшыг саваад, нөөцөө бараад, улс нь өртэй болоод орж ирсэн үр дүн байна шүү дээ. Та үүнийг юу гэж харж байна вэ? 

Н.Батбаяр: Тийм ээ. Доллар бол гарцаагүй хэрэгтэй зүйл. Доллар гадагшаа явдаг нь хорвоогийн жам. Хөгжлийн банканд 1,5 тэрбум ам.доллар орж ирсний дараагаар орон сууцны найман хувийн зээлийг бий болгосон. Энэ бол Чингис бондын бас нэг давуу тал. Бид төмөр зам барина гээд 200 сая доллар өгсөн. Хамгийн эмгэнэлтэй зүйл бол төмөр зам баригдаагүй. Энэ бол бидний алдаатай бодлого" гэв. 

Д.Батчулуун