Хөгжлийн банктай холбоотой Нотлох баримтыг шинжлэн судлах хоёр дахь шатны сонсгол үргэлжилж байна. 

Өнөөдрийн сонсголоор Улсын төсвөөс эргэн төлөгдөх нөхцөлтэйгөөр санхүүжүүлсэн төсөл, арга хэмжээний хэрэгжилтийн талаар хэлэлцэж байна. 

Энэ үеэр УИХ-ын гишүүн Д.Батлут гэрч Худалдааны санхүүжилтийн газрын захирал Б.Амгалан, БХБЯ-ны Төрийн нарийн бичгийн дарга асан Р.Эрдэнэбүрэнгээс асуулт асууж, хариулт авлаа.

Д.Батлут: Зээлийн 80-90 хувь нь гадагшаа гараад явсантай санал нэг байна. Магадгүй зам барилгын түүхий эд материалын зардалд гадагшаа гараад явчихсан. Энэ төслүүдийг санхүүжүүлэхдээ импортыг орлох бүтээгдэхүүн үйлдвэрлэхэд нийт зээлийн хэдэн хувийг зарцуулсан бэ? Хэдэн хувь нь улсын төсвөөс санхүүжүүлэх боломжтой хөрөнгө оруулалтын ажлууд хийгдсэн бэ?

Хөрөнгө оруулалт хийхдээ зураг төсөл нь батлагдаагүй байхад хийгдсэн байна. Ажлууд нь одоог хүртэл дуусаагүй байна. Ямар ажлууд ямар шалтгааны улмаас дуусаагүй вэ? Энэ ажлууд дуусах боломж байна уу? Бидний авсан зээл үр өгөөжтэй байсан уу? Үгүй юу? Мөнгө босгоод зээл олгосон нь хуулийн хүрээнд байсан уу?

Р.Эрдэнэбүрэн: Манай яам 26 ажил төсөвлөсөн байсан. 2010-2011 онд 100 мянган орон сууцны хөтөлбөр батлагдсан. Энэ хөтөлбөрийн ажлын зураг төсөв нь хийгдсэн байсан. 2011 оны ажлын зураг төсвөөр хийсэн учраас манай яамны хувьд төсөв өөрчлөгдсөн зүйл байхгүй.

Б.Амгалан: Хөгжлийн банк байгуулагдсан цагаас хойш нийт 7.5 их наядын төсөл арга хэмжээг санхүүжүүлсэн. Үүнээс 2.5 буюу 33 хувь нь улсын төсвийн шинж чанартай төсөл хөтөлбөр. Үлдсэн нь арилжааны банкуудаар дамжуулан олгосон төслүүд юм.  Хөгжлийн банкны одоо мөрдөгдөж байгаа хуулиар төсөл хөтөлбөрийн 60 хувь нь экспорт руу чиглэсэн байх хуультай. Магадлангийн хувьд манай банканд мэдээлэл байхгүй. Учир нь ерөнхий гэрээ байгуулдаг байсан. Төсөл гүйцэтгэгч, захиалагч нь Сангийн яам гэж ордог байсан" гэв. 

Д.Батчулуун