Хөгжлийн банктай холбоотой Нотлох баримтыг шинжлэн судлах хоёр дахь шатны сонсгол үргэлжилж байна. 

Өнөөдрийн сонсголоор Сайншанд Аж үйлдвэрийн цогцолбор ТӨХХК, Зам, тээвэр хөгжлийн яам – “Шинэ төмөр зам” төсөл байгууллагуудтай холбоотой зээлийн асуудлуудыг нотлох баримтын хүрээнд шинжлэн судална. Нийт 39 гэрчийг гэрчээр дууджээ. 

Энэ үеэр УИХ-ын гишүүн Т.Доржханд гэрч Ерөнхийлөгч асан Х.Баттулгаас асуулт асууж, хариулт авлаа.

Т.Доржханд: Жижиг дүнтэй асуудал дээр та өөрөө ороод ирлээ л дээ. Тийм болохоор жижиг байж магадгүй. Гэхдээ хөгжлийн банктай холбоотой энэ асуудлууд Монгол Улсыг татаж унагаах, Засгийн газрыг дефолт зарлах хэмжээнд аваад ирсэн. Тиймээс жижиг гэж яримаагүй байна. Одоо ярьж буй зүйл хувь хүн рүү дайрсан зүйл байхгүй шүү. Та бид хоёрын хувьд хувийн ямар нэг асуудал байхгүй байх аа. Та нэг хэлчихгүй юу? Миний хувьд байхгүй. 

Х.Баттулга: Яриагдаж буй сэдэв, асуудлыг дээд зэргээр ойлгож байгаа. Жижиг гэж яриагүй. Буруугаар ойлгочих шиг боллоо. Ач холбогдолоо ойлгож, энд ирж тайлбар хийх боломж олгож байгаад баярлалаа. Чи л намайг яриад байдаг болохоос биш би чиний талаар ярьдаггүй шүү. Хувь хүний хооронд асуудал байхгүй. 

Т.Доржханд: Монгол Улс аж үйлдвэрлэл, химийн үйлдвэр зэргийг санхүүжүүлж хийх ёстой. Үүнд санал нэг байна. Тухайн үед ямар хэмжээний хөрөнгө оруулалтыг оруулж ирнэ гэсэн бодитой ярьсан зүйл байдаг юм уу. Мөн хоёр тэрбум долларыг гаргаж ирнэ гэж ярьсан зүйл байна уу. Шинжээчид дүгнэлт ямар ч ашиггүй байсан гэх дүгнэлт гарсан. Та болохоор одоо хүртэл үүнийг дуусгахад бэлэн байна гэсэн зүйлийг ярьж байна шүү дээ. 

Х.Баттулга: Хоёр тэрбум доллараа олоод, хөрөнгө оруулалтаа хийчихсэн, Т.Доржханд аа.

Төмөр зам, автозам, усны нөөцийн хайгуул хийчихсэн. Үүнийг Засгийн газар хоёр тэрбумаар үнэлж болно. Хоёр тэрбум доллараа өнгөрсөн хугацаанд хийчихсэн. Чи итгэхгүй байх шиг байна тэ?

Цаасыг гоё гэж ярьдаггүй. Энэ бол маш үнэ цэнэтэй цааш. Манай энэ гоё макет, гоё цаасан дээр Японы ерөнхий сайд Абэ хөрөнгө оруулна гээд гарын үсэг зураад явж байсан. 

Т.Доржханд: Үр ашиггүй гээд шинжээчин дүгнэлт гарчихсан байна" гэв. 

Д.Батчулуун