Хөгжлийн банктай холбоотой Нотлох баримтыг шинжлэн судлах хоёр дахь шатны сонсгол үргэлжилж байна.
Өнөөдрийн сонсголоор Сайншанд Аж үйлдвэрийн цогцолбор ТӨХХК, Зам, тээвэр хөгжлийн яам – “Шинэ төмөр зам” төсөл байгууллагуудтай холбоотой зээлийн асуудлуудыг нотлох баримтын хүрээнд шинжлэн судлах бөгөөд 39 хүнийг гэрчээр дууджээ.
Энэ үеэр УИХ-ын гишүүн Т.Доржханд гэрч Ерөнхийлөгч асан Х.Баттулгаас асуулт асууж, хариулт авлаа.
Тэрбээр "Бид нар маш их баялагтай орон. Энэ баялаг түүхийгээрээ гарч болохгүй. Орж ирсэн орлого аманд ч үгүй хамарт ч үгүй байна. 100 ам.долараар зараад 15 хувийг нь оффшорт хийдэг хэдхэн баячуудтай болсон. Монгол Улс 5000 км төмөр зам тавьж чадах юм бол баялгаа нэг улс руу л гаргадаг хараат бус байдал үгүй болно. Зөвхөн Хятадад баялгаа зараад хөгжинө гэж байхгүй.
ТҮЦ-нд бараагаа зардаг настан маш олон төрлийн зүйл зарж байж амьдардаг. Нүүрсийг зөвхөн нэг улсад зарахад цар тахлаар юу болсон билээ. Төмөр зам гэдэг бол ложистик, тээврийн том хэрэгсэл юм.
Төв ази, Хятад Орос хоёрыг холбох ёстой. Түүгээр нэг “Эрдэнэт” үйлдвэрийн ашигтай тэнцэх ашиг олох боломжтой. Зүүн азийн мөрөдөл юу вэ, хөгжиж байгаа зүүн Азитай эдийн засгаар холбогдох. Хятад, Оросоор холбогдох боломж маш бага байдаг.
Асуудлыг Х.Баттулга гэдэг хүн яриад байгаа учраас янз бүрийн байдлаар хорлогдоод байна. Тухайн үед Сү.Батболд мөнгө гаргаж өгөөгүй юм. Мөнгө шийдээд өгчихсөн бол төмөр зам баригдчих байсан. Алтан ширээд боловсруулах үйлдвэр байгуулах асуудлыг энэний нам, тэрний нам гэхгүйгээр энэ ажлыг хиймээр байгаа юм" гэв.
Д.Батчулуун
