Ардчилсан намын даргын сунгаа хоёр талд явагдаж, Л.Гантөмөр, Д.Ганбат нар шалгарсан. Ийнхүү тэд Ардчилсан намын даргаар бүртгүүлэхээр материалаа Улсын дээд шүүхэд өгөөд байсан юм. Тэгвэл Улсын дээд шүүх өчигдөр хурдалдаж, Ардчилсан намын даргаар Л.Гантөмөрийг бүртгэсэн билээ.

Шүүхийн шийдвэр ийнхүү гарсан ч Ардчилсан намын даргын асуудал эцэслэгдэхгүй нь бололтой.

Тухайлбал, С.Эрдэнэ "Л.Гантөмөр хаанаас дэвшсэн юм бэ? Гудамжинд хэдэн хүн цугалж хуралдаад, түүнийгээ Ардчилсан намын Үндэсний бодлогын хорооны хуралдаан гэж нэрлэсэн. Тэгээд л хэн нэгэн Л.Гантөмөр гэдэг хүнийг тамга тэмдэггүй, улсын бүртгэлийн гэрчилгээ байхгүй аваачаад өгөхөд Дээд шүүх бүртгэж байна.

Энэ нь Монгол Улс хуульгүй, дүрэмгүй, төр гэдэг зүйл байхгүй болж байна. Бүх зүйл ширэнгийн хуулиар явах юм байна. Монголд Улс төрийн нам гэж байгаа юм уу. Эрх баригчдын үзэмжээр улс төрийн намууд байгуулагддаг болчихлоо. Гол сөрөг хүчний намыг хүртэл МАН-ын удирдамж, заавраар томилдог болж байх шиг байна. Албан ёсны шийдвэрийг нь харъя" гэсэн юм. Өөрөөр хэлбэл, тэрбээр Л.Гантөмөрийг эсэргүүцэж буйгаа илэрхийлсэн. 

Мөн Ардчилсан намын Үндэсний бодлогын хорооны гишүүн Ч.Өнөрбаяр хэвлэлд өгсөн ярилцлагадаа "Шүүх Ардчилсан намын даргаар Л.Гантөмөрийг бүртгэсэн учир бичилтээ хийгээд өгчихнө. Одоо асуудалгүй. Өгөхгүй бол тамгыг шинээр хийлгэчихнэ асуудалгүй" гэжээ. 

Ийнхүү Ардчилсан намын даргаар Л.Гантөмөрийг Улсын дээд шүүх бүртгэсэн ч, тэдний хоорондох маргаан дахин үргэлжилж магадгүй юм. 

Д.Батчулуун