Хотын нийтийн тээвэрт туршилтаар гаргах Узбекистан улсын “Самавто” компанийн SAZ LE60 маркийн автобусыг хүлээлгэн өглөө. Энэ үеэр Түгжрэл хариуцсан сайд Ж.Сүхбаатар мэдээлэл өглөө. 

Тэрбээр "Энэ бол манай улсын хувьд таатай боломж юм. Хоёр автобус бэлэглэж байгаа төдий биш Монголын нөхцөлд хэр оновтой байна вэ гэдгийг харна. Улаанбаатар хот хамгийн хүйтэн хот шүү дээ. Тиймээс Улаанбаатар хотод энэхүү автобус шалгуурыг нь давбал цаашид манай улсад нийлүүлээд, хойд зах зээлд гарах бололцоо байгаа хэмээн харж байгаа юм билээ. Нийтийн тээврийн хүрэлцээ хангамж үнэхээр дутагдалтай байна. Шинэ автобус оруулж ирэхээр автобусны тоо нэмэгдэж байна гэж ойлгоод байдаг. Гэвч үгүй юм. Үйлчилгээнээс гарах автобуснуудаа гаргаж байгаа. Дахин ашиглалтаас гарах 400, 500 автобус хүлээж байгаа. Монголд ийм үйлдвэрлэл явуулахаар болбол байнга Хятадын царай хараад байхгүй болно. 

Монголын нөхцөлд турших гэж буй энэхүү автобус бол Японы технологоор орж ирж байгаа. Монголын нөхцөлд ямар байна гэдгийг харах гэж байгаа. Узбекстанд үйлчилгээнд явдаг автобуснууд юм. Бидний хамтын ажиллагаа эхэлж байгаа нь сайн хэрэг. 

Бидний гол зорилго бол нийтийн тээвэр. Зун 700 автобус шинээр оруулж ирнэ. Тэдгээр автобуснууд бол одоогийн явж буй автобуснуудаас чанар илүү түвшинд орж ирнэ. Есдүгээр сараас өмнө парк шинэчлэлийн асуудлыг дуусгана" гэв. 

Д.Батчулуун