УИХ дахь Ардчилсан намын бүлгийн гишүүд, тус намын Эв нэгдлийн ажлын хэсгийн гишүүд мэдээлэл хийлээ.

АН-ын бүлгийн дарга О.Цогтгэрэл, "Ардчилсан нам ҮБХ-гоор намын даргаа сонгож, их хурлаар ёсчлон баталж, Улсын дээд шүүхэд бүртгэгдсэн албан ёсны намын даргатай болсон. Иймээс АН-ын бүлэг ээлжит бусаар өргөтгөсөн хуралдаан хийлээ. Өнгөрсөн хугацаанд АН-ын бүлгээс зохион байгуулагдсан ажлын хэсгийн үйл явцыг тухай, АН-ын даргын шинээр баримтлах бодлогын тухай АН-ын бүлэг дээр болон өргөтгөсөн хуралдаанд дарга мэдээлэл хийлээ.

Үгний эхэнд заавал нэг зүйлийг онцгойлон хэлэхийг хүсэж байна. Өнгөрсөн гурван жил орчим хугацаанд бараг 1000 шахам хоног ойлгомжгүй байдал АН-д үүссэн. АН-д үүссэн энэ байдал Монгол төрийн асуудал болж өнгөрсөн хугацаанд үргэлжилсэн. Энэ асуудалд цэг тавигдлаа.

Энэ асуудалд анхнаас нь эв нэгдлийн талд байж, учраа олж АН үндсэн улстөрийн намынхаа тэр тусмаа баруун төвийн үзэл баримтлалдаа бат тууштай зогсохыг шахаж шаардаж дэмжиж ирсэн намын гишүүддээ, дэмжигчдэдээ, нийт ард иргэддээ амжилт, ажлын үр дүн гарсан энэ өдрийн мэндийг хүргэх ёстой. АН-ын дотоод асуудал гэдэг зөвхөн намын асуудал биш, энэ Монгол Улсын асуудал. АН цэгцрэх нэг хэрэг. Одоо бид бүгдэд тэр тусмаа шинээр сонгогдсон намын даргад асар их хэмжээний үүрэг хариуцлага, хүлээлт үүсч байна. Яагаад гэвэл бага биш хугацаанд засаглаж байгаа, хэт олонхоор засаглаж байгаа улстөрийн хүчин эрх чөлөөг боомилсон, хувийн өмч рүү халдсан тэр тусмаа хүний үгээ хэлэх, үзэл бодлоо илэрхийлэх эрх чөлөө рүү халдсан.

Энэ үйлдлээ эцэс сүүлд нь хуулийн аргаар, төрийн дарангуйллаар боомилохдоо хүртэл хүрсэн олон зүйлд АН хаана байна вэ гэдгийг олон нийт шахаж шаардаж байна. Энэ бол нийгмийн захиалга, эрэлт хэрэгцээ, шаардлага олон үйл явц болж байна. УИХ-ын чуулганы завсарлагаан болж гишүүд тойрогтоо ажиллаж байна. Миний бие тойрогтоо ажиллаад өнөөдөр ирлээ.

Сумдаар ороход иргэд хоёр зүйл санаа их зовж байна. Нэгдүгээрт нь, амьдрал ядуурчихлаа. Хоёрдугаарт, Монгол Улсад шударга бус байдал хавтгай болчихлоо. Төрийн албаны хулгай, төрийн өмчит аж ахуйн нэгжүүдийн хулгай санаанд багтамгүй зүйлүүд бий болчихлоо. Энэ бүхэнд ард иргэдийн бухимдал дээд цэгтээ хүрч, тэсрэхэд бэлэн болсон байдалтай байна.

Бид бүгдийн санаа бодол ч биш олон улсын авлигалыг хэмждэг, индексийг гаргадаг олон улсын байгууллагуудаар Монгол Улс нэг жилийн дотор 10, 20 байраар. Сүүлийн жилүүдийн дотор хоёр оронтой тоонд багтаж далан хэдэд орж байсан орон одоо 120, 130 орж эхэлж байна. Гадны байгууллага ч, ард иргэд ч Монгол Улсыг авлигалд идэгдсэн, ядууралд өртсөн гэж тодорхойлж байна. Энэ бүгдийг шийдэхэд намын шинэ даргад үүрэг хариуцлага ноогдож байгаа гэж АН-ын бүлгийн зүгээс үзэж бүрэн дүүрэн дэмжиж ажиллахаа илэрхийлж байна" гэв.

А.Сүх