АТГ-аас Нүүрсний гэх хэргийн талаар мэдээлэл өгч байна. Энэ үеэр АТГ-ын хэвлэл мэдээлэл, олон нийттэй харилцах ажилтан Н.Тэмүүлэн мэдээлэл өглөө.
Тэрбээр "Хэрэг бүртгэлийн 24, мөрдөн байцаалтын 16 нийт 40 хэрэгт мөрдөн шалгах ажиллагаа явуулж байна. Шүүхэд шилжүүлэх саналтайгаар гурван хэргийг прокурорын газарт хүргүүлсэн. Мөрдөн шалгах ажиллагаагаар:
- Нэгжлэг хийх ажиллагааг 134
- Хүний бие, баримт бичигт үзлэг хийх ажиллагааг 408 удаа
- Хэрэг хянан шийдвэрлэх ажиллагааны оролцогч 925 хүнээс мэдүүлэг
- Байгууллага, ААН, иргэнээс 905 баримт, материал гаргуулан авсан зэрэг мөрдөн шалгах ажиллагааг тасралтгүй явуулж байна.
Өнгөрсөн хугацаанд мөрдөн шалгах ажиллагааны явцад 78 иргэн, албан тушаалтанд эрүүгийн хэрэг үүсгэн, яллагдагчаар татсан байна. Яллагдагч нарыг албан тушаалаар нь авч үзвэл: Нийтийн албан тушаалтан 42 шалгагдаж байна. Үүнд:
- УИХ-ын гишүүн А.Адъяасүрэн хахууль өгөх гэмт хэрэгт яллагчаар татагдсан
- УИХ-ын гишүүн Т.Аюурсайхан зохион байгуулалттай гэмт бүлэг байгуулах, үндэслэлгүйгээр хөрөнгөжих
- УИХ-ын гишүүн С.Раднаасэд албан тушаалын байдлаа урвуулан ашиглаж, бусдад хохирол учруулсан
- УИХ-ын гишүүн Ж.Мөнхбат албан тушаалын байдлаа урвуулан ашиглаж, бусдад хохирол учруулсан, үндэслэлгүйгээр хөрөнгөжих
- УИХ-ын гишүүн Н.Наранбаатар албан тушаалын байдлаа урвуулан ашиглаж, бусдад хохирол учруулсан
- УИХ-ын гишүүн Б.Энх-Амгалан албан тушаалын байдлаа урвуулан ашиглаж, бусдад хохирол учруулсан зэрэг үндэслэлээр яллагдагчаар татагдсан.
Мөн Зам тээврийн хөгжлийн сайд асан нэг, Төрийн нарийн бичгийн дарга асан хоёр, Аймаг сумын засаг дарга хоёр, УИХ-ын гишүүний зөвлөх нэг, Гаалийн улсын байцаагч 12, хил хамгаалах газрын дөрвөн албан тушаалтан, авто тээврийн дөрвөн албан тушаалтан, боомтын захиргааны мэргэжилтэн хоёр, "Эрдэнэс Тавантолгой" ХК-ийн зургаа, Тавантолгой төмөр зам компанийн гурав, нэр бүхий хуулийн этгээдийн эрх бүхий албан тушаалтан 14 зэрэг 22 иргэн тус тус яллагдагчаар татагдсан байна.
Хэргийг шалгах явцад 17 яллагдагчид цагдан хорих арга хэмжээ авснаас одоо долоон яллагдагч цагдан хоригдож байна. Мөн хилээр гарах эрхийг хязгаарласан 35, албан үүргийг биелүүлэхийг түдгэлзүүлэх дөрөв, хувийн баталгаа авах арга хэмжээг 26 яллагдагчид авсан байна" гэв.
Д.Батчулуун
